Me fillimin e këtij muaji, udhëtimi gjatë natës në autobusët e transportit publik nuk mund të paguhet më me SMS, por vetëm me biletë letre të blerë te shoferi, e cila kushton 50 denarë dhe duhet të paguhet me para në dorë. Arsyeja e këtij vendimi ishte një nga pyetjet drejtuar kryetarit të komunës, Orce Gjorgjievski, në seancën e sotme të Këshillit të Qytetit të Shkupit, informon PressOnline.al
Sipas kryetarit të komunës, kjo masë do të zbatohet derisa të vihet në funksion siç duhet sistemi i pagesës, i cili duhet ta mbrojë NQP “Shkup”.
“Ne kemi një mospagesë enorme të biletave për shkak të një sistemi jofunksional, të cilin dikush nga udhëheqja e mëparshme e NQP-së ka vendosur ta paguajë dy milionë euro. Kjo nënkupton falsifikim të mesazheve, mospagesë dhe derisa ta vëmë sistemin në funksion ashtu siç duhet, pra ta modernizojmë dhe ta bëjmë mbrojtës për ndërmarrjen, qytetarët do të duhet ta blejnë biletën te shoferi”, u përgjigj kryetari i komunës, përcjell PressOnline.al
Është e qartë se edhe në këtë rast, para së gjithash mendohet për interesat e ndërmarrjes publike të transportit, por jo edhe për qytetarët e Shkupit, të cilët çdo ditë e përdorin transportin publik dhe tashmë dy-tre vite kalojnë nëpër një “golgotë” për shkak të mungesës së autobusëve të rregullt, mosrespektimit të orarit të vozitjes, mungesës së higjienës në autobusë, si dhe mbingarkesës në mjete, të cilat shpesh janë pa klimatizim ose pa ngrohje.
Ndërkohë, shumica e udhëtarëve paguajnë rregullisht për udhëtimin dhe kanë karta mujore, të cilat i përdorin për një shërbim transporti që as për së afërmi nuk i përmbush kushtet – nuk është as funksional, as modern, as efikas.
Ndërsa NQP “Shkup” ekziston pikërisht për këtë arsye: të sigurojë transport normal dhe dinjitoz për qytetarët e Shkupit.
