Tema e zgjedhjeve të mundshm të parakohshme parlamentare ka rikthyer në qendër të skenës politike Maqedoninë e Veriut, duke nxjerrë në pah ndarjet e thella mes partive politike. Ndërsa disa kërkojnë votim të ri, të tjerë paralajmërojnë se një cikël i ri zgjedhor mund të sjellë vetëm bllokim institucional, pa adresuar problemet reale të vendit, shkruan PressOnline.al
Kreu i LSDM-së, Venko Filipçe, argumenton se qeveria aktuale nuk ka kapacitet të menaxhojë krizën dhe e ka krijuar vetë situatën problematike. Ai thekson se mandatin nuk mund të përfundojë deri në vitin 2028 pa zgjedhje të parakohshme.
“Mendoj se sigurisht do të ketë zgjedhje të parakohshme për shkak të krizës që na pret, të cilën kjo qeveri praktikisht e ka krijuar. Nuk di si ta menaxhojë sepse nuk ka as vullnet, as kapacitet. Kujdeset vetëm për interesat e veta. Kjo është arsyeja pse zgjedhjet e parakohshme janë të domosdoshme. Nëse do të jenë në fund të këtij viti ose në të ardhmen, do ta shohim, por deri në 2028 nuk mund të vazhdojë kështu,” tha Filipçe, përcjell PressOnline.al
Edhe BDI qëndron në qëndrimin se zgjedhjet e parakohshme janë të nevojshme, duke argumentuar mungesën e legjitimitetit të qeverisë aktuale.
“Qëndrojmë pas kërkesës sonë për zgjedhje të parakohshme parlamentare. Sot ballafaqohemi me sfida që rrezikojnë Marrëveshjen e Ohrit, për shkak të një qeverisjeje pa legjitimitet,” deklaroi Arbër Ademi, sekretar i përgjithshëm i BDI-së.
Kryeministri dhe lideri i VMRO-DPMNE-së, Hristijan Mickoski thotë se zgjedhjet e parakohshme do të çojnë vetëm në bllokadë institucionale dhe humbje të resurseve.
Zëvendëskryeministri i parë Bekim Sali, i pyetur për mundësinë e zgjedhjeve të parakohshme, theksoi se qytetarëve u nevojiten zgjidhje konkrete dhe jo domosdoshmërisht zgjedhje të reja.
“Qytetarëve u duhen zgjidhje për një jetë më të mirë, jo zgjedhje të menjëhershme. Analiza e situatës politike tregon se mund të jetë më e dobishme të vazhdojmë me organizime të tjera, duke shfrytëzuar momentumet pozitive nga fitoret e kaluara,” tha Sali, duke shtuar se VLEN synon rezultate pozitive dhe rritje të përkrahjes në zgjedhjet e ardhshme parlamentare.
Me qëndrime kaq të ndara, debati për zgjedhjet e parakohshme mbetet një nga linjat kryesore të konfrontimit politik në Maqedoninë e Veriut. Pyetja që mbetet është nëse vendi do të shkojë drejt një cikli të ri zgjedhor apo do të përpiqet të përfundojë mandatin aktual.(PressOnline.al)


