Një ngjarje e pakëndshme ndodhi gjatë një fluturimi me destinacion Egjiptin, kur një pasagjere britanike 38-vjeçare shkaktoi kaos në kabinë, sulmoi një stjuardesë dhe detyroi pilotin të bëjë një ulje emergjente në Heraklion të Kretës.
Gruaja, e cila udhëtonte me bashkëshortin dhe fëmijën e saj, thuhet se ishte e dehur dhe filloi të bërtiste sepse ishte shqetësuar nga një pasagjere e cila, siç pretendoi ajo, po i godiste me shqelma sediljen.
Më pas, ajo goditi dhe gërvishti një asistente fluturimi, duke e gjakosur, ndërsa nuk hezitoi të kërcënonte pasagjeret e tjera me fraza të tilla si: “Ju të gjithë do të rrëzoheni nga një shpërthim”.
Videot e regjistruara nga pasagjerët tregojnë gruan duke bërë gjeste, duke mallkuar dhe duke bërtitur, ndërsa të tjerët përpiqen ta qetësojnë, duke i thënë të “qetësohet”. Edhe fëmija i saj duket se po mbulon fytyrën, i turpëruar nga imazhi.
Sipas dëshmive, pasagjerja u zhvendos nga ekuipazhi në rreshtin e parë të vendeve për t’u kontrolluar më lehtë, por sjellja e saj u përshkallëzua. Pasagjerët përshkruan se ajo po “mallkonte të gjithë”, ndërsa në një moment ajo iu drejtua edhe partnerit të saj, duke i bërtitur: “Mbarova me ty, të urrej”.
Piloti, duke gjykuar se siguria e pasagjerëve ishte në rrezik, njoftoi devijimin e fluturimit për në Heraklion.
Pavarësisht uljes, gruaja vazhdoi të provokonte, duke thënë se “do të largohet me kokën lart” dhe duke kërkuar një cigare në pistë.
Ajo u arrestua përfundimisht nga policia në Kretë, ndërsa burri i saj dhe vajza e tyre vazhduan udhëtimin e tyre për në Egjipt./vizionplus.tv
