Guvernatori i Bankës Popullore të Maqedonisë së Veriut, Trajko Sllaveski, njoftoi se institucionet po përgatitin masa që do të ndikojnë në qasjen ndaj kreditimit të banesave, duke favorizuar ata që blejnë për herë të parë dhe duke kufizuar mundësinë e kreditimit për blerjen e banesës së dytë ose të tretë, kryesisht për investime, përcjell PressOnline.al.
Sllaveski sqaroi se aktualisht në 73% të deklaratave të dhëna para bankave komerciale, kreditorët deklarojnë se marrin kredi për blerje banese për jetesë, por kjo shpesh është vetëm formalitet, pasi nuk kontrollohet saktësia e të dhënave.
“Çdokush deklaron se blen banesë për jetesë dhe askush nuk e verifikon adresën reale të banimit. Duhet të krijojmë mekanizma që të bëjnë të dallueshëm ata që blejnë për herë të parë dhe të rrisim përgjegjësinë materiale të deklaratave. Nëse konstatohet se një deklaratë është e rreme, kjo konsiderohet shkelje serioze dhe banka mund të vendosë gjobë”, tha Sllaveski.
Guvernatori theksoi se masat do të relaksojnë kreditimin për blerësit e parë, ndërsa do të ashpërsojnë kriteret për investitorët që blejnë prona për dhënie me qira ose për qëllime turistike. Ai gjithashtu shtoi se përmes një bashkëpunimi me Agjencinë për Kadastër, Banka do të ketë akses në të dhënat për tregun e pasurive të paluajtshme, për të mundësuar një rregullim më të mirë të tij.
Nga fundi i shtatorit, sipas drejtorit të Kadastrit, Ivan Zhivkovski, do të rifillojë funksionimi i Regjistrit të Çmimeve të Pasurive të Paluajtshme, i cili kishte ndaluar disa vite më parë. Regjistri i ri do të pasqyrojë çmimet reale dhe do të ofrojë të dhëna më të sakta për qytetarët, duke marrë parasysh ndryshimet e çmimeve në tregun aktual.
Guvernatori Sllaveski gjithashtu theksoi se Banka Popullore po shqyrton mundësinë e masave fiskale, si rimbursimi i TVSH-së për blerësit e parë të banesës, për të lehtësuar qasjen në pronësi për qytetarët e rinj. (PressOnline.al)
