TIRANË, 2 korrik/ATSH/ Punimet për vënien në funksion të dy veprave të rëndësishme të marrjes së ujit në lumin Mat: Mat-Kurbin dhe Mat-Lezhë, kanë përfunduar dhe aktualisht po kryhet procesi i kolaudimit të rrjetit ujitës për dy projekte.
Kryeministri Edi Rama publikoi pamje nga kantieri i punimeve, teksa bëri të ditur se vepra e marrjes së ujit Mat-Kurbin do të mundësojë ujitjen e 4,500 hektarëve tokë bujqësore në territorin e Bashkisë Kurbin.
Ndërsa rrjeti ujitës Mat-Lezhë do të furnizojë me ujë për vaditje rreth 4,000 hektarë tokë bujqësore në zonën e Bashkisë Lezhë.
Këto investime pritet të rrisin ndjeshëm potencialin bujqësor në këto zona, duke mbështetur zhvillimin e sektorit të bujqësisë dhe përmirësuar jetesën e fermerëve.
