Në një reagim të ashpër publik, Aleanca për Shqiptarët ka denoncuar shkatërrimin masiv të pyjeve në malin Kozhuf, duke akuzuar një kompani në pronësi të biznesmenit të njohur të kazinove, Gjoko Sterjoski, për një ndërhyrje brutale në natyrë, që po dëmton seriozisht biodiversitetin dhe po rrezikon jetesën e komuniteteve në rajon.
“Kjo është një katastrofë ekologjike me pasoja afatgjata. Mali Kozhuf nuk është tokë e askujt për ta shndërruar në projekt të radhës komercial për interesa të kazinove”, thuhet në reagimin e ASh-së.
Në të njëjtën kohë, ASH akuzon ministrin aktual të Ekologjisë, Izet Mexhiti, për bashkëpunim të heshtur dhe të qëllimshëm.
“Qëndrimi i tij i papranueshëm tregon për kapje politike dhe financiare. Ai po sillet si peng i industrisë së lojërave të fatit dhe po i mbyll sytë përballë një krimi mjedisor”, thonë nga ASH, përcjell PressOnline.al
Aleanca paralajmëron se kjo nuk është thjesht një çështje ekologjike, por një temë me peshë kombëtare dhe shoqërore. “Kozhufi është pasuri e përbashkët, jo pronë private për eksperimentet e radhës të oligarkëve dhe të atyre që i mbulojnë nga zyrat shtetërore.”
Në fund të reagimit, ASh njofton se ditëve në vijim do të dalë me fakte të reja për lidhjet direkte të zyrtarëve të koalicionit VLEN me rrjetet e kazinove dhe do të kërkojë llogaridhënie publike.
