Në emisionin Debat Plus, analisti Yll Hoxha ka zbërthyer deklaratën e fundit të Donald Trump rreth dialogut Kosovë–Serbi, duke theksuar se ish-presidenti amerikan po sinjalizon një rikthim aktiv në këtë temë gjatë mandatit të dytë presidencial.
Sipas Hoxhës, deklarata e Trump përmban tri mesazhe të qarta politike që duhet të merren seriozisht nga institucionet në Kosovë.
“Tri mesazhe të cilat duhet me i lexu dhe me i marrë seriozisht,” tha Hoxha.
Hoxha tha se Trump tashmë e ka renditur çështjen Kosovë–Serbi në mesin e krizave globale që administrata e tij do të synojë t’i adresojë.
“Kosova dhe Serbia janë çështje që administrata Trump mund të merret gjatë këtij mandati, për të cilën kemi pas hamendje a do të merret apo jo, a është në listë të prioriteteve apo jo. Pra, renditet dhe krahasohet me Indinë e Pakistanin si kriza, Etiopinë e Egjiptin – dmth hyn në radhën e krizave që këta kanë synim me i adresu,” tha ai.
Pika e dytë, sipas Hoxhës, është një kritikë e qartë ndaj qasjes së ish presidentit amerikan, Joe Biden.
“Procesi i zhvilluar nga administrata Biden konsiderohet si i dështuar dhe i dëmshëm. Ne duhet të konstatojmë se gjatë kësaj administrate ka ndodhë Marrëveshja e Brukselit dhe Marrëveshja e Ohrit. Dhe është hera e parë që – nëse është e saktë kjo që e lexojmë – ky i konsideron që kanë qenë të padobishme si procese,” shtoi ai.
Hoxha vlerëson se deklarata më e fortë e Trump është zotimi personal për të ndrequr situatën.
“Këtu është një deklaratë në kllapa që thotë I’m gonna fix it – unë do ta ndreq këtë situatë. Bëhet fjalë për pretendim se ka ardhë një ide se si ndreqet kjo puna jonë,” theksoi Hoxha.
