Bashkëkryetari i VLEN-it, Bilall Kasami, ka përshëndetur hyrjen në fuqi të sistemit të përbashkët të kontrollit kufitar “One Stop Shop” ndërmjet Maqedonisë së Veriut dhe Shqipërisë, duke e cilësuar këtë si një hap konkret drejt lehtësimit të lëvizjes së qytetarëve dhe forcimit të bashkëpunimit mes dy vendeve.
Përmes një postimi në rrjetet sociale, Kasami ka njoftuar se, së bashku me kryeministrin shqiptar Edi Rama dhe kryeministrin e Maqedonisë së Veriut, Hristijan Mickoski, kanë promovuar zbatimin e sistemit të ri kufitar në Qafë Thanë, pikërisht në Ditën e Alfabetit Shqip. “Më pak kontrolle, më pak pritje, më shumë besim te njëri-tjetri!”, ka shkruar Kasami, duke theksuar se ky mekanizëm do të mundësojë kalim më të shpejtë dhe më të lehtë të kufirit për qytetarët e të dyja vendeve.
Sipas tij, përveç Qafë Thanës, sistemi i ri do të zbatohet edhe në katër vendkalime të tjera kufitare, ku qytetarët do t’i nënshtrohen vetëm një kontrolli, në vend të procedurave të deritanishme të dyfishta. “Shkurtojmë pritjet, lehtësojmë lidhjen mes dy shteteve tona dhe afrohemi me njëri-tjetrin si asnjëherë më parë”, ka theksuar bashkëkryetari i VLEN-it.
Kasami ka nënvizuar se afrimi me Shqipërinë dhe Kosovën mbetet një nga përcaktimet politike të koalicionit VLEN, duke shtuar se ky angazhim nuk duhet të mbetet vetëm në nivel deklaratash, por të konkretizohet përmes projekteve dhe masave që lehtësojnë jetën e qytetarëve. “Ky ishte përcaktimi ynë si VLEN, që me Shqipërinë e Kosovën të afrohemi jo vetëm deklarativisht, por edhe me masa konkrete si One Stop Shop dhe me projekte infrastrukturore si dy autostradat strategjike që po i ndërtojmë”, ka deklaruar Kasami.
Në fund të mesazhit të tij, ai ka uruar qytetarët për Festat e Nëntorit, duke e lidhur simbolikisht këtë zhvillim me rëndësinë e bashkëpunimit dhe afrimit ndërmjet shqiptarëve në rajon.



