Reagimi vjen pasi Arlinda i shprehu hapur pëlqimin e saj Norës, një situatë që duket se ka shqetësuar nënën e kësaj të fundit.
Përmes një reagimi të gjatë, ajo ka treguar se Nora është rritur jashtë Kosovës, në një shoqëri shumëkulturore, ku është edukuar t’i pranojë dhe t’i respektojë të gjithë njerëzit, pavarësisht kombësisë, ngjyrës së lëkurës apo orientimit seksual.
Sipas saj, Nora është një person i hapur dhe i afërt me të tjerët, që nuk sheh asgjë të pazakontë në krijimin e një shoqërie me dikë, pa menduar se sjelljet e saj mund të keqinterpretohen.
Megjithatë, nëna e banores ka theksuar se Nora nuk e njeh aq mirë mentalitetin e shoqërisë shqiptare, ndryshe nga Arlinda, e cila, sipas saj, është mjaftueshëm e pjekur dhe e vetëdijshme për mënyrën se si mund të perceptohet raporti i tyre nga publiku.
Për këtë arsye, ajo i është drejtuar drejtpërdrejt Arlindës, duke i kërkuar që të mos e shfrytëzojë çiltërsinë dhe besimin e Norës për interesa të lojës dhe të mos e vendosë në situata që mund ta dëmtojnë.
Nëna e Norës ka shtuar se e kupton që Big Brother është një lojë ku secili banor ka strategjitë dhe interesat e veta, por për të është e papranueshme kur këto strategji zhvillohen në dëm të dikujt tjetër.
Megjithëse pjesa më e madhe e reagimit i është kushtuar shoqërisë mes Norës dhe Arlindës, ajo në fund ka pasur edhe një mesazh për të gjithë banorët e shtëpisë.
Ajo i ka këshilluar që ta shfrytëzojnë këtë mundësi për të treguar talentet, cilësitë dhe anën e tyre më të mirë, në vend që të përqendrohen te sjelljet që mund t’i lëndojnë të tjerët.
Në fund, nuk ka munguar as një mesazh emocionues për Norën, të cilën e ka inkurajuar të mos e humbasë buzëqeshjen, të vazhdojë të këndojë e të vallëzojë dhe të mos ndryshojë për askënd.
Ajo i ka kujtuar vajzës së saj se familja e do dhe e mbështet pa kushte, ndërsa e ka siguruar se, pavarësisht se si do të përfundojë rrugëtimi i saj në Big Brother, talenti dhe vlerat që ka do ta shoqërojnë edhe jashtë shtëpisë.


