Aktori dhe komediani britanik Russell Brand është përballur me akuza të rënda në nisje të gjyqit për përdhunim dhe sulme seksuale ndaj gjashtë grave, për ngjarje që dyshohet se kanë ndodhur përgjatë një dekade, nga viti 1999 deri në vitin 2009.
Gjatë seancës së parë në Gjykatën e Southwark në Londër, prokurorja Riel Karmy-Jones e përshkroi Brand si një person “të pamëshirshëm, llogaritës dhe manipulues”, duke e cilësuar atë si një “grabitqar seksual”.
Sipas prokurorisë, gjashtë gratë, të cilat nuk njiheshin me njëra-tjetrën, pretendojnë se janë sulmuar në ambiente të ndryshme, përfshirë një dhomë hoteli, vende pune, tualetin e një bari dhe banesën e aktorit.
Prokurorja deklaroi se, në atë periudhë, Brand kishte një dëshirë të pakontrolluar për kontakte seksuale dhe se, sipas akuzës, gratë ishin për të “thjesht një mjet për të arritur qëllimin”.
Brand, 51 vjeç, është deklaruar i pafajshëm për tri akuza për përdhunim, tri për sulm seksual dhe një për sulm të pahijshëm. Çështja ndaj tij është ende në proces gjyqësor dhe akuzat nuk përbëjnë një vendim fajësie.
Aktori u paraqit të mërkurën në gjykatë, ku u prit nga një numër i madh fotografësh dhe gazetarësh. I pyetur për procesin gjyqësor, ai u shpreh se ndihej “i bekuar”, ndërsa pranoi se ishte i shqetësuar për situatën.
“Sigurisht që jam i shqetësuar, por edhe shpresëplotë se ky proces do të çojë në rezultate të mira për të gjithë të përfshirët. Kjo është lutja ime”, deklaroi Brand.
Ai ndodhet në liri me kusht gjatë zhvillimit të procesit. Russell Brand u bë i njohur fillimisht përmes karrierës së tij në komedi, përpara se të fitonte famë si prezantues televiziv në MTV, Channel 4 dhe BBC. Ai shkroi gjithashtu kolumna në gazeta dhe publikoi dy autobiografi.
Më vonë, Brand u bë pjesë e industrisë së filmit në Hollywood, ku interpretoi në disa produksione të suksesshme. Jeta e tij private mori vëmendje të madhe mediatike edhe për shkak të martesës së shkurtër me këngëtaren amerikane Katy Perry.
Aktualisht, ai është i rimartuar dhe jeton në Florida me familjen e tij. Vitet e fundit, Brand ka ndërtuar gjithashtu një audiencë të madhe në internet, me rreth 6 milionë abonentë në YouTube, 10.1 milionë ndjekës në X dhe 4.9 milionë në Instagram.
