Michael Douglas ka folur hapur për betejën e tij me kancerin dhe ndikimin që sëmundja pati në jetën e tij, në kujtimet e reja “One Helluva Ride”.
Aktori u diagnostikua me kancer në fazën e katërt në vitin 2010 dhe iu nënshtrua një trajtimi intensiv me kimioterapi dhe rrezatim. Gjatë shtatë javëve të trajtimit, ai humbi rreth 18 kilogramë, një rënie e konsiderueshme në peshë që e la fizikisht shumë të dobësuar.
Douglas ka treguar se gjatë javëve të para dhimbjet ishin të vështira, ndërsa më pas gjendja e tij u përkeqësua ndjeshëm. Ai ka përshkruar një periudhë kur ishte aq i dobët sa mezi e njihte veten.
Për aktorin, përvoja nuk ishte vetëm një betejë fizike. Ai ka folur edhe për mbështetjen që mori nga familja, veçanërisht nga bashkëshortja Catherine Zeta-Jones dhe fëmijët e tyre, Dylan dhe Carys.
Gjatë kimioterapisë dhe rrezatimit, duke parë mbështetjen që mora nga fëmijët e mi… më kujtoi sa e afërt është familja dhe sa mbështetëse dhe e mrekullueshme ishte Catherine
-ka rrëfyer Douglas.
Sipas tij, sëmundja ndryshoi edhe mënyrën se si e shihte jetën. Pas përvojës, ai vendosi t’u kushtonte më shumë kohë njerëzve të afërt dhe të vlerësonte më shumë momentet familjare.
Douglas është shprehur se diagnoza i ndryshoi prioritetet dhe e bëri më të vetëdijshëm për rëndësinë e familjes dhe marrëdhënieve me njerëzit që ka pranë. Sot, ai thotë se është më i qetë me jetën dhe karrierën e tij dhe i kushton më shumë rëndësi familjes.
Në kujtimet “One Helluva Ride”, aktori 82-vjeçar rrëfen episode të ndryshme nga karriera, jeta familjare, varësia dhe beteja me kancerin, duke reflektuar mbi mënyrën se si këto përvoja kanë ndikuar në personin që është sot.
