Nga Besnik Rama
Shteti nuk është diçka „atje lart“, mbi ne. Ne e ndërtojmë shtetin, çdo ditë, me sjelljen dhe veprimet tona. Shqipëria nuk ndryshon vetëm me protesta të herëpashershme, por me atë që secili prej nesh bën çdo ditë.
Si e ndryshon Shqipërinë duke ndryshuar vetveten:
1. Me gjuhën
Kur flet shqip me fëmijët e tu edhe jashtë. Kur s’e përzien me 100 gjuhë të tjera.
Ke shpëtuar një copë atdhe.
2. Me punën
Kur bën punën me ndershmëri. Pa ryshfet, pa “më njeh dikush”. Kur paguan taksat dhe kërkon faturë.
Ke thyer një zinxhir korrupsioni.
3. Me kujtesën
Kur i tregon një fëmije një histori, një këngë, një traditë. Kur nuk harron nga vjen.
Ke luftuar sëmundjen e harresës.
4. Me qëndrimin
Kur zgjedh të rrish dhe të ndërtosh këtu. Ose kur ikën, por e mban Shqipërinë gjallë me investime, me kulturë, me krenari.
Ke ndaluar ikjen e rinisë.
Politikanët vijnë e ikin. Ligjet ndryshojnë.
Por një popull që nuk ndryshon vetë, asnjë qeveri s’e shpëton.
Një mësues që jep mësim me pasion ka ndryshuar Shqipërinë.
Një polic që s’merr ryshfet ka ndryshuar Shqipërinë.
Një nënë që i këndon fëmijës “Ti, Shqipëri, më jep nder” ka ndryshuar Shqipërinë.
Revolucioni i vërtetë fillon në shtëpinë tënde.
Ti vetë me çfarë po fillon? Me këngën, me historinë apo me traditën?
Sepse secila prej tyre është një Shqipëri më e mirë.
