Tom Cruise është i njohur për përkushtimin ekstrem ndaj roleve të tij, por për filmin e ri “Digger” ai shkoi edhe më tej. Aktori duhej t’i nënshtrohej çdo ditë një transformimi të komplikuar me proteza, grim dhe kostum special, proces që fillimisht zgjaste plot gjashtë orë.
Cruise, i cili në film interpreton personazhin Digger Rockwell, një manjat të çuditshëm të industrisë së naftës, shfaqet krejtësisht ndryshe nga pamja e tij e zakonshme. Për rolin ai ka flokë gri, një trup dukshëm më të madh dhe përdor proteza të shumta për të krijuar pamjen e personazhit.
Por gjashtë orë në karrigen e grimit nuk ishin të përballueshme për një produksion me ditë të gjata xhirimesh. Cruise tregoi në podcastin “New Heights” se nisi të bënte llogaritjet: duhej të flinte të paktën gjashtë orë dhe kishte rreth 12 orë xhirime çdo ditë.
Herën e parë që bëmë grimin, zgjati gjashtë orë
-tregoi aktori, duke shpjeguar se menjëherë mendoi se duhej gjetur një mënyrë për ta bërë procesin më efikas.
Dhe Cruise nuk u mjaftua vetëm me një kërkesë ndaj ekipit. Ai erdhi me një tabelë, një marker dhe një kronometër, duke matur kohën që nevojitej për vendosjen e çdo pjese të protezave.
Synimi i tij ishte ambicioz, ta zbriste procesin nga gjashtë orë në më pak se një orë.
Në fillim, ekipi i grimit nuk ishte aspak i bindur. Cruise tregoi se ata i thanë se diçka e tillë nuk ishte e mundur. Por aktori këmbënguli që çdo hap të matjej, të analizohej dhe të përsëritej.
Me çdo pjesë që vendosej, koha matej dhe më pas praktikonim e stërviteshim
-shpjegoi ai.
Metoda e tij funksionoi. Pas shumë përsëritjesh, ekipi arriti ta përfundonte të gjithë procesin e grimit dhe protezave në më pak se 60 minuta.
Më pëlqen të hyj në një sistem, ta studioj dhe të përpiqem të kuptoj se si mund ta bëj më mirë, më me efikasitet
-tha Cruise, duke përshkruar mënyrën se si i qaset punës së tij.
Por transformimi nuk ishte i vështirë vetëm për shkak të kohës. Cruise tregoi se përdorimi i protezave dhe kostumit të posaçëm ishte fizikisht i lodhshëm. Ai djersiste nën proteza gjatë skenave të gjata dhe ekipi duhej të përdorte edhe pajisje ftohëse për ta ndihmuar gjatë xhirimeve.
“Digger”, me regji të Alejandro González Iñárritu, është një nga rolet më të pazakonta të Cruise. Filmi e sjell atë si një manjat nafte që përpiqet të bindë botën se është shpëtimtari i njerëzimit përpara se një katastrofë e shkaktuar prej tij të dalë jashtë kontrollit. Në kast janë gjithashtu Riz Ahmed, John Goodman dhe Sandra Hüller. Filmi pritet të dalë në kinema më 2 tetor 2026.
Transformimi mund të ketë qenë ekstrem, por për Cruise duket se sfida është pikërisht ajo që e tërheq më shumë: të provojë diçka që nuk e ka bërë më parë dhe të gjejë mënyra të reja për ta çuar performancën e tij në një tjetër nivel.
