Jennifer Lawrence ka hapur zyrtarisht llogarinë e saj në Instagram, pas vitesh qëndrimi larg rrjeteve sociale, por që në postimin e saj të parë aktorja vendosi një kusht të qartë për ndjekësit: të mos ketë komente negative.
Ylli i “The Hunger Games” e bëri debutimin në platformë më 9 shtator, ndërsa në videon e saj të parë u shfaq pa grim dhe me humorin karakteristik.
Po, po i jap një mundësi. Dhe nëse dikush thotë diçka negative, do të largohem menjëherë. Pa pyetje
-tha Lawrence në videon e parë.
Ajo vazhdoi me të njëjtin ton:
Nëse dikush mendon diçka të keqe, do ta kuptoj. Do ta kuptoj dhe do të largohem.
Aktorja e vazhdoi shakanë edhe në Instagram Stories, ku shkroi se komentet e këqija ose agresive mund të ndikojnë negativisht te “bebja”.
Ju lutem, kini parasysh se çdo koment i keq ose agresiv mund të ndikojë negativisht te bebi. Jam unë. Unë jam bebi
-shkroi ajo me humor.
Lawrence ka qenë prej vitesh e rezervuar ndaj rrjeteve sociale dhe ka folur hapur për arsyet që e kanë mbajtur larg tyre.
Në një intervistë të vitit 2018 për “InStyle”, ajo e përshkroi veten si një përdoruese që vetëm vëzhgon, pa marrë pjesë aktivisht në diskutimet online. Ajo tha se në rrjetet sociale kishte shumë reagime dhe njerëz me opinione për gjithçka, diçka që nuk dëshironte ta ftonte në jetën e saj pa ndonjë arsye të veçantë.
Tani, megjithatë, aktorja duket se ka vendosur t’i japë një mundësi Instagramit, duke vendosur që në fillim kufijtë e saj.
Lawrence nuk mundi të përdorte emrin e plotë si emër përdoruesi, pasi “@jenniferlawrence” ishte tashmë i zënë. Për këtë arsye, ajo zgjodhi “@jlaw”, pseudonimin me të cilin njihet prej vitesh.
Llogaria tërhoqi me shpejtësi miliona ndjekës, ndërsa në seksionin e komenteve u shfaqën edhe reagime nga miq dhe kolegë të saj të famshëm.
Pavarësisht paralajmërimit të saj, duket se fansat deri tani janë treguar të kujdesshëm. Tani mbetet për t’u parë nëse Jennifer Lawrence do ta vazhdojë aventurën në Instagram apo, nëse dikush e tepron me komentet, do t’i qëndrojë besnike premtimit të saj për t’u larguar menjëherë.
