Rezultatet e PISA-s edhe këtë vit janë shumë të dobëta dhe fajin për këtë ministrja e Arsimit Vesna Janevska e sheh te reformat që janë bërë më parë. “Ne erdhëm në pushtet në vitin 2024, vetëm gjashtë muaj më pas në vitin 2025 janë bërë këto testime” u shpreh ajo. Nxënësit 15-vjeçarë kanë rezultate më të dobëta në matematikë krahasuar me vitin 2022, ndërsa rezultatet në lexim dhe shkencë mbeten pothuajse në të njëjtin nivel.
“Për fat të keq, në vitin 2001 kemi pasur rezultate më të mira në lexim dhe të kuptuar. Rezultatet më të mira i kemi pasur në vitin 2018, që, sipas mësimdhënësve dhe analizave, është rezultat i reformës ‘Kembrixh’. Rezultatet e reformës që po zbatohet aktualisht do t’i shohim kur këta nxënës të mbushin 15 vjeç, pra diku pas 9-10 vitesh. Për fat të keq, nuk bëhet fjalë vetëm për programet. Do të duhet t’u kushtojmë shumë më tepër vëmendje edhe elementeve të tjera që përbëjnë sistemin arsimor”, u shpreh Janevska.
Ekzistojnë teza se teknologjia ka ndikim të konsiderueshëm në këto rezultate në nivel global, tha Janevska, duke folur për rezultatet e dobëta.
“Po ekzistojnë edhe teza të tjera se e gjithë situata shoqërore në vende të caktuara, si dhe situata globale, kanë ndikim të konsiderueshëm. Ende nuk mund të themi se vetëm inteligjenca artificiale kontribuon seriozisht në këtë. Ndoshta ndikim më të madh kanë rrjetet sociale, përdorimi i pakontrolluar i telefonave dhe tabletëve”, tha Janevska.
Sipas rezultateve të testimit ndërkombëtar PISA 2025, në testin e matematikës vetëm 32 për qind e nxënësve kanë arritur të paktën nivelin bazë të njohurive. Në shkencë, rreth 36 për qind e nxënësve në vend kanë zotëruar konceptet bazë. Në raport theksohet se në këtë fushë asnjë nxënës nuk ka arritur nivelet më të larta 5 ose 6. Ndërkaq, vetëm rreth 26 për qind e nxënësve në Maqedoninë e Veriut kanë arritur nivelin 2 ose më lart në lexim.
