Reperi dhe producenti amerikan Sean “Diddy” Combs, i njohur si P Diddy, do të duhet të qëndrojë më gjatë në burg, pasi data e parashikuar për lirimin e tij është ndryshuar sërish.
Combs, i cili aktualisht ndodhet në Qendrën Federale Korrektuese “Fort Dix” në New Jersey, ishte planifikuar të lirohej më 5 shkurt 2028, sipas të dhënave të fundit. Megjithatë, autoritetet kanë bërë një tjetër ndryshim në datën e lirimit.
Data e lirimit të reperit është shtyrë në disa raste. Sipas raportimeve, në korrik ajo u zhvendos nga 23 shkurti në 24 janar 2028, pas një konflikti me një të burgosur tjetër.
Më pas, në fillim të shtatorit, të dhënat e Byrosë Federale të Burgjeve tregonin se Combs pritej të lirohej më 20 shkurt 2028. Tani, data është ndryshuar sërish.
Ndryshimet kanë ardhur në një periudhë kur reperi ndodhet në qendër të vëmendjes edhe për shkak të një incidenti në burg.
Në korrik, TMZ raportoi se 56-vjeçari ishte përfshirë në një përplasje verbale dhe fizike me një të burgosur tjetër. Sipas burimeve, situata u përshkallëzua pasi Combs u ofendua nga i burgosuri, ndërsa stafi i burgut ndërhyri për t’i ndarë.
Pas incidentit, reperi u vendos në izolim, prej të cilit u lirua në gusht. Byroja Federale e Burgjeve nuk pranoi të komentojë në mënyrë specifike për rastin, duke iu referuar politikave të saj për privatësinë dhe sigurinë e të burgosurve.
Combs u dënua me 50 muaj burg pasi u shpall fajtor për dy akuza që lidhen me transportimin e personave me qëllim prostitucioni.
Ai u shpall i pafajshëm për akuzat më të rënda për trafikim seksual me forcë, mashtrim ose shtrëngim, si dhe për komplot për shantazh.
Pas dënimit, ai u transferua nga Qendra Metropolitan e Paraburgimit në Brooklyn drejt burgut “Fort Dix”. Ndërkohë, Combs vazhdon të përballet edhe me dhjetëra padi civile, të cilat përfshijnë akuza për sulm seksual dhe vepra të tjera. Reperi i ka mohuar keqbërjet.
