Rodri Hernández është rikthyer në Manchester dhe i është bashkuar stërvitjes së Manchester Cityt, në një moment kur klubi anglez dhe Barcelona po negociojnë për transferimin e mesfushorit spanjoll.
Rodri u rikthye te skuadra angleze këtë të premte, ashtu siç kishte paralajmëruar trajneri Enzo Maresca. Mesfushori spanjoll pritet të vijojë programin e rikuperimit përpara se të nisë stërvitjen e plotë me pjesën tjetër të ekipit.
“Merkatoja është e hapur. Mund të blejmë lojtarë dhe mund të shesim. Mund të ndodhë gjithçka. Sapo e pashë Rodrin në ndërtesë dhe i dhashë një përqafim të madh. Duket se është mirë, kështu që do të shohim se çfarë do të ndodhë”, deklaroi Maresca në konferencën për shtyp.
Trajneri shtoi se Rodri do të ndjekë fillimisht një program rehabilitimi dhe, pasi të jetë gati për të nisur stërvitjen, do t’i bashkohet grupit.
Rikthimi i Rodrit në Manchester vjen një ditë pasi Manchester City raportohet se ka refuzuar ofertën e dytë të Barcelonës për mesfushorin.
Sipas mediave britanike, oferta e fundit e klubit katalanas ishte rreth 64 milionë euro, ndërsa Manchester City e vlerëson Rodrin në rreth 70 milionë paund, ose afërsisht 82 milionë euro.
Barcelona e konsideron spanjollin një nga objektivat kryesorë të merkatos, por negociatat me Manchester Cityn mbeten të vështira.
Pavarësisht se Rodri është në vitin e fundit të kontratës, klubi anglez nuk ka ndërmend ta lërë të largohet pa përfituar një shumë të konsiderueshme.
Ndërkohë, Manchester City po përgatitet për finalen e Community Shield ndaj Arsenalit, e planifikuar për të dielën në Cardiff. Megjithatë, nga deklaratat e Marescas duket se Rodri nuk është ende në gjendje të luajë në këtë sfidë.
