LSDM po reagon ndaj kërkimfaljes së kryeministrit Hristijan Mickoski për ngjarjet e djeshme në Parlament. Partia opozitare thotë se kryeministri, “i cili i quan qytetarët brejtës dhe plehra, po vë në skenë vetëm teatër të lirë për të zbutur rënien e vlerësimit të tij personal”.
“Mickoski beson se një “më falje” e turpshme dhe e sforcuar, e shqiptuar në një sallë të zbrazët parlamentare, mund të lajë të gjitha fyerjet e drejtuara deri më tani ndaj qytetarëve. Nuk mund t’i quani qytetarët “llum të shoqërisë”, “brejtës”, “mediokritet”, “molusqe” dhe pastaj së bashku me bashkëpunëtorin tuaj të parë Ivan Stoilkovic të mallkoni deputetët në Parlament”, thuhet në reagimin e partisë opozitare.
Ata shtojnë se një sjellje e tillë është e papërshtatshme për një profesor universiteti, duke e quajtur të turpshme për universitetin, parlamentin dhe shtetin.
-Një sjellje e tillë e një kryeministri nuk është parë kurrë në asnjë vend normal. Rënia në këtë nivel nuk mund të justifikohet me asgjë, aq më pak me humbjen e mbështetjes nga qytetarët dhe rënien e vlerësimeve personale, të cilën ai vetë e shkaktoi me gënjeshtrat e tij të përditshme. Mickoski nuk u kërkoi falje qytetarëve. Ai u përpoq të tregonte se po u kërkonte falje deputetëve, në një kohë kur salla ishte bosh, me qëllim që të krijonte pamjen e një “korrigjimi” – thonë nga LSDM.
Partia opozitare shton se qytetarët nuk janë naivë dhe se një kërkimfalje e vërtetë do të thotë pranim i një gabimi.
“Dhe deri më tani kemi parë vetëm teatër nga Mickoski. Qytetarët meritojnë respekt, jo fyerje nga kryeministri i vendit”, tha LSDM.
