Të paktën 18 persona janë plagosur nga dy shpërthime që tronditën Damaskun të martën, pranë hotelit ku raportohej se po qëndronte presidenti i Francës, Emmanuel Macron, njoftuan autoritetet siriane.
Në kohën e shpërthimeve, Macroni ndodhej në Pallatin Presidencial, ku po zhvillonte një takim me presidentin sirian, Ahmed al-Sharaa.
Dy mjete shpërthyese artizanale (IED) shpërthyen pranë hotelit “Four Seasons”, një nga objektet më të siguruara në kryeqytetin sirian, ku qëndrojnë punonjës të OKB-së dhe diplomatë të huaj.
Sipas mediave shtetërore siriane, incidenti nuk e ndërpreu vizitën e Macronit. Ato publikuan fotografi të presidentit francez dhe homologut të tij sirian duke u përshëndetur në Pallatin Presidencial.
Shpërthimet, megjithatë, përbëjnë një goditje për autoritetet e reja siriane, të cilat po përpiqen të paraqesin vendin si të qëndrueshëm dhe tërheqës për investime të huaja pas rrëzimit të ish-presidentit Bashar al-Assad në dhjetor të vitit 2024.
Macroni është lideri i parë i madh perëndimor që viziton Sirinë pas largimit të Assadit. Takimi i tij me Ahmed al-Sharaanë në Damask është parë si një njohje e rëndësishme ndërkombëtare për udhëheqjen e re siriane.
Al-Sharaa dhe qeveria e tij kanë punuar për t’u distancuar nga e kaluara e tyre si luftëtarë islamistë të grupit Hayat Tahrir al-Sham (HTS), i cili ka rrënjë nga rrjeti i Al-Kaedës.
Franca ka qenë ndër vendet perëndimore më mbështetëse ndaj qeverisë së re siriane, duke bërë presion që Shtetet e Bashkuara të heqin sanksionet ndaj Sirisë dhe duke luajtur rol në përpjekjet për ndërmjetësim mes Sirisë dhe Izraelit.
Gjatë vizitës në Damask, Macroni shoqërohet nga një delegacion ekonomik, ku përfshihet edhe Jacques Saadé, drejtues i kompanisë së transportit detar CMA CGM, i cili ka origjinë siriane. Presidenti francez pritet të nënshkruajë memorandume bashkëpunimi me Sirinë, me synim rritjen e besimit të investitorëve në një vend të goditur nga lufta dhe kriza ekonomike.
Një video e publikuar pas shpërthimit të parë tregon pjesëtarë të policisë siriane pranë një koshi mbeturinash, i cili më pas shpërthen duke plagosur katër policë.
Ministria e Brendshme e Sirisë tha se një tjetër mjet shpërthyes ishte vendosur në një automjet të parkuar dhe se gjithsej 18 persona mbetën të plagosur. Autoritetet kanë nisur hetimet për të zbuluar autorët e sulmit.
Ky është sulmi i dytë me mjete shpërthyese në Damask brenda pak ditësh. Të enjten e kaluar, një bombë e vendosur në një kafene pranë Pallatit të Drejtësisë vrau të paktën 10 persona dhe plagosi më shumë se 20 të tjerë. Asnjë grup nuk ka marrë përgjegjësinë për atë sulm.
Siria së fundmi është përballur me sulme nga grupe të ndryshme të armatosura, përfshirë Shteti Islamik dhe grupe të lidhura me ish-regjimin e Assadit. Deri javën e kaluar, Damasku kishte qenë kryesisht i kursyer nga dhuna, ndërsa zona të tjera të vendit përballeshin me rrëmbime dhe vrasje të synuara, në kohën kur qeveria e re përpiqet të vendosë kontrollin e saj.
