Rikonstruimi i paralajmëruar i Qeverisë pritet të sjellë një frymë të re në kabinetin qeveritar, ndërsa vëmendjen më të madhe e kanë tërhequr propozimet e VLEN-it për dy resore të rëndësishme: Agon Ferati për ministër të Sistemit Politik dhe Marrëdhënieve ndërmjet Bashkësive dhe Jeton Shasivari për ministër të Drejtësisë, shkruan PressOnline.al.
Bëhet fjalë për dy emra që nuk vijnë nga pozita të konsumuar politike, por nga profile me përvojë institucionale, profesionale dhe akademike. Me këto propozime, VLEN synon të dëshmojë se përfaqësimi në Qeveri nuk duhet të jetë vetëm çështje politike, por edhe çështje kompetence, përgatitjeje dhe përgjegjësie ndaj qytetarëve.
Agon Ferati, i propozuar për ministër të Sistemit Politik dhe Marrëdhënieve ndërmjet Bashkësive, është një kuadër me përvojë të gjatë në menaxhimin e projekteve dhe në proceset që lidhen me integrimin evropian. Sipas biografisë së tij zyrtare, ai nga viti 2013 punon në Komunën e Tetovës si këshilltar për menaxhimin e projekteve të financuara nga Bashkimi Evropian, ndërsa gjatë viteve 2023-2024 ka qenë pjesë e UNOPS-it si ekspert për Kapitullin 8 të BE-së.
Karriera e Feratit ka kaluar edhe nëpër zhvillime të rëndësishme politike. Fillimisht ai u bë i njohur si shef kabineti i Menduh Thaçit, ndërsa më vonë iu bashkua Ziadin Selës në periudhën e formimit të Lëvizjes për Reforma në PDSH, ku u pozicionua si një nga figurat e rëndësishme të atij procesi. Edhe pse për një periudhë ishte më pak i pranishëm në publik, propozimi i tij për ministër tregon se Ferati ka mbetur aktiv në skenën politike dhe institucionale, këtë herë brenda platformës së VLEN-it.
Marrja e Ministrisë së Sistemit Politik dhe Marrëdhënieve ndërmjet Bashkësive nga VLEN ka edhe peshë të veçantë politike. Ky resor, i krijuar në vitin 2019 pas transformimit të Sekretariatit për zbatimin e Marrëveshjes së Ohrit, tradicionalisht është parë si një institucion me rëndësi të veçantë për përfaqësimin e drejtë dhe marrëdhëniet ndëretnike. Me propozimin e Agon Feratit, VLEN synon t’i japë këtij dikasteri një drejtim më të qartë, më profesional dhe më të lidhur me parimet e Marrëveshjes së Ohrit, integrimit evropian dhe bashkëjetesës institucionale.
Në anën tjetër, propozimi i Jeton Shasivarit për ministër të Drejtësisë është një nga vendimet më të fuqishme të VLEN-it në këtë rikonstruim. Shasivari është profesor universitar i së drejtës kushtetuese në Universitetin e Evropës Juglindore në Tetovë dhe një nga emrat më të njohur në fushën juridike dhe akademike në vend. Ai nuk vjen si zgjidhje klasike partiake, por si ekspert i jashtëm, gjë që i jep këtij propozimi peshë shtesë profesionale, shkruan PressOnline.al.
Sipas biografisë së tij, Shasivari është pjesë e Universitetit të Evropës Juglindore që nga viti 2002. Ai ka qenë zëvendëskryetar i Bordit për Akreditim dhe Evaluim të Arsimit të Lartë në periudhën 2015-2019, ndërsa nga viti 2019 është ligjërues në Akademinë për Gjykatës dhe Prokurorë. Këto angazhime e bëjnë atë një profil të përgatitur për të udhëhequr një nga resoret më të ndjeshme dhe më të rëndësishme në Qeveri.
Shasivari ka qenë gjithashtu i përfshirë në procese të rëndësishme shtetërore dhe juridike. Në vitin 2020 ai ishte pjesë e grupit të ekspertëve të ftuar nga presidenti i atëhershëm Stevo Pendarovski për mendim profesional lidhur me shpalljen e gjendjes së jashtëzakonshme gjatë pandemisë së COVID-19. Po ashtu, në periudhën 2021-2023 ka qenë këshilltar i jashtëm i kryetarit të Kuvendit në kuadër të dialogut “Zhan Mone” për përgatitjen e Rregullores së re të Kuvendit.
Pas ndryshimeve politike të vitit 2024, Shasivari u bë pjesë e grupit punues për përgatitjen e Ligjit për përfaqësim të drejtë dhe adekuat, një proces me rëndësi të veçantë pas shfuqizimit të balancuesit. Ai ka mbrojtur publikisht idenë se ky ligj duhet ta avancojë parimin kushtetues të përfaqësimit të drejtë, duke e ngritur atë nga niveli politik në një nivel më të qartë juridik dhe institucional.
Propozimi i Shasivarit për ministër të Drejtësisë shihet si sinjal se VLEN dëshiron ta udhëheqë këtë resor me ekspertizë, seriozitet dhe qasje profesionale. Ministria e Drejtësisë është një nga institucionet kyçe për reformat, sundimin e ligjit, funksionimin e gjyqësorit dhe procesin eurointegrues. Vendosja e një profesori të së drejtës kushtetuese në krye të këtij dikasteri mund të konsiderohet si një hap i rëndësishëm drejt fuqizimit të kapaciteteve profesionale në Qeveri.
Me Agon Feratin dhe Jeton Shasivarin, VLEN po tenton të imponojë një model të ri përfaqësimi në pushtet: më pak retorikë partiake dhe më shumë përgatitje profesionale, më pak improvizim dhe më shumë përvojë institucionale. Ferati sjell përvojë në menaxhimin e projekteve evropiane dhe në marrëdhëniet ndërmjet komuniteteve, ndërsa Shasivari sjell autoritet akademik dhe ekspertizë juridike në një nga resoret më të rëndësishme të shtetit.
Rikonstruimi qeveritar, që pritet të shqyrtohet në seancën e Kuvendit më 13 korrik, do të përfshijë edhe emra të tjerë të rinj në kabinetin qeveritar, por pikërisht propozimet e VLEN-it për drejtësinë dhe marrëdhëniet ndërmjet bashkësive janë ndër më domethënëset. Ato tregojnë se kjo parti synon të marrë përgjegjësi në resore të ndjeshme, aty ku kërkohen dije, maturi politike dhe aftësi institucionale.
Në këtë kuptim, hyrja e Agon Feratit dhe Jeton Shasivarit në Qeveri paraqitet si një mundësi për standard të ri në udhëheqjen e institucioneve: me më shumë profesionalizëm, më shumë përfaqësim cilësor dhe më shumë fokus te reformat që i duhen vendit. (PressOnline.al)
