Justin Bieber mund të jetë një nga yjet që do të performojë në finalen e Kupës së Botës, e cila do të zhvillohet më 19 korrik në stadiumin MetLife në New Jersey.
Sipas TMZ, FIFA është në bisedime për ta përfshirë këngëtarin kanadez në spektaklin e madh të finales, ku thuhet se po shqyrtohet edhe pjesëmarrja e emrave si Madonna, Shakira dhe grupi BTS.
Burime pranë negociatave kanë bërë të ditur se ende nuk është marrë një vendim përfundimtar, por diskutimet vazhdojnë.
Shfaqja pritet të drejtohet nga Chris Martin, vokalisti i Coldplay, ndërsa do të transmetohet drejtpërdrejt për miliona shikues në mbarë botën. Sipas raportimeve, pjesë e programit do të jenë edhe personazhet e famshëm të “Sesame Street”, duke i dhënë spektaklit një dimension familjar dhe argëtues.
Justin Bieber ishte një nga emrat kryesorë edhe në ceremoninë hapëse të Kupës së Botës në Inglewood, ku së bashku me bashkëshorten e tij, Hailey Bieber, tërhoqi vëmendjen e publikut.
Në atë event, artisti surprizoi të ftuarit VIP me një performancë intime të këngës “Yukon”, ndërsa ceremonia u karakterizua nga një kombinim i muzikës pop dhe ritmeve latine.
Në ceremoninë hapëse performuan edhe Shakira dhe Burna Boy me këngën zyrtare të turneut “Dai Dai”, si dhe emra të njohur si J Balvin, Alejandro Fernández, Belinda, Danny Ocean, Lila Downs, Los Ángeles Azules, Maná dhe Tyla.
Ndërkohë, ceremonia e zhvilluar në Toronto solli në skenë Michael Bublé, Alanis Morissette, Alessia Cara, Jessie Reyez, Nora Fatehi, Elyanna, Sanjoy, Vegedream dhe William Prince.
Në pjesën amerikane të spektaklit morën pjesë Katy Perry, Future, Anitta, LISA, Rema dhe sërish Tyla, duke e kthyer ceremoninë në një festë të madhe muzikore.
Nëse marrëveshja finalizohet, Justin Bieber do t’i bashkohet një prej formacioneve më të mëdha artistike të organizuara ndonjëherë për finalen e Kupës së Botës. Megjithatë, deri tani FIFA nuk ka konfirmuar zyrtarisht listën e artistëve që do të performojnë në spektaklin e finales.
