Të dhënat e fundit të Eurostat e vendosin sërish Maqedoninë e Veriut në grupin e vendeve evropiane me nivelin më të ulët të çmimeve, krahas Bullgarisë, Rumanisë dhe Serbisë. Megjithatë, sipas ekonomistëve, çmimet e ulëta nuk do të thonë domosdoshmërisht standard më i mirë jetese, pasi fuqia blerëse përcaktohet edhe nga pagat dhe produktiviteti i ekonomisë.
Në analizën e Eurostat thuhet se Serbia ka çmime në nivelin e rreth 62.5 për qind të mesatares së Bashkimit Evropian, çka e rendit ndër vendet më të lira në Evropë. Sidoqoftë, dallimet janë të mëdha kur bëhet fjalë për kategori të ndryshme produktesh dhe shërbimesh.
Në veçanti, ushqimet dhe pijet joalkoolike në Serbi kanë arritur afërsisht 96 për qind të mesatares së BE-së. Kjo i bën ato më të shtrenjta se në disa shtete të rajonit dhe të Evropës Lindore, përfshirë Maqedoninë e Veriut, Bullgarinë, Rumaninë, Poloninë, Çekinë, Sllovakinë, Bosnjë e Hercegovinën dhe Turqinë.
Nga ana tjetër, çmimet e pajisjeve elektronike për konsum në Serbi rezultojnë rreth 30 për qind më të larta se mesatarja evropiane, ndërsa pajisjet shtëpiake kushtojnë afërsisht 11 për qind më shumë se mesatarja e BE-së.
Në të kundërt, energjia vijon të jetë ndjeshëm më e lirë, pasi çmimet e saj arrijnë vetëm rreth 49 për qind të mesatares së Bashkimit Evropian. Kjo e rendit Serbinë mes vendeve me kostot më të ulëta për energjinë elektrike dhe ngrohjen.
Eurostat nënvizon se indeksi i përgjithshëm i çmimeve nuk e paraqet gjithmonë koston reale të jetesës, sepse disa kategori tashmë janë afruar ose e kanë tejkaluar mesataren evropiane, ndërsa të tjera vazhdojnë të mbeten dukshëm më të lira.
Sa i përket ushqimeve në Evropë, çmimet më të larta janë regjistruar në Luksemburg, ku qëndrojnë rreth 22 për qind mbi mesataren e BE-së. Në anën tjetër, çmimet më të ulëta janë evidentuar në Rumani, rreth 20 për qind nën mesataren evropiane.
