Pak orë para ndeshjes së parë të Anglisë në Kupën e Botës 2026 kundër Kroacisë, një grup luanësh në Britaninë e Madhe kanë tërhequr vëmendjen me një parashikim të pazakontë. Në një aktivitet simbolik të organizuar në një qendër për mbrojtjen e maceve të mëdha në Kent, luanët Rori, Yuna, Amani, Lira dhe Vanda u vendosën përballë kutive të dekoruara me flamujt e Anglisë dhe kundërshtarëve të saj në Grupin L.
Sipas kujdestarëve të tyre, luani Rori “parashikoi” një fitore 3-1 të Anglisë ndaj Kroacisë, ndërsa luanesha Yuna u shfaq optimiste për ecurinë e skuadrës së drejtuar nga trajneri gjerman Thomas Tuchel. Aktiviteti u zhvillua në formën e një loje pasuruese për kafshët, por ka tërhequr vëmendjen e tifozëve anglezë, të cilët e kanë marrë me humor dhe entuziazëm këtë “mbështetje” të veçantë.
Luanët e përfshirë në aktivitet janë shpëtuar nga Ukraina dhe janë sistemuar në Britani pas operacioneve të evakuimit të kryera vitin e kaluar. Sipas stafit të qendrës, secili prej tyre ka një histori të veçantë mbijetese. Parashikimet e tyre sugjerojnë se Anglia do të fitojë edhe ndaj Ganës, ndërsa mund të hasë vështirësi në ndeshjen e fundit të grupit kundër Panamasë. Megjithatë, sipas “analizës” së luanëve, gjashtë pikë do të mjaftojnë për të siguruar kalimin në fazën me eliminim direkt.
