Lëvizja Vetëvendosje ka arritur të sigurojë 53 ulëse në Kuvendin e Kosovës, ndërsa Lidhja Demokratike e Kosovës ka humbur një mandat në krahasim me përllogaritjet e mëhershme.
Sipas të dhënave të përditësuara nga procesi i numërimit të votave, LDK-ja tashmë ka 18 deputetë, një më pak se 19 sa kishte deri më tani.
Ndryshimi ka ardhur si rezultat i votave të mërgatës, përkatësisht votimit përmes postës, i cili po vazhdon të numërohet në Qendrën e Numërimit dhe Rezultateve.
Ndërkohë, Partia Demokratike e Kosovës ka ruajtur 22 mandatet e saj në Kuvend, ndërsa Aleanca për Ardhmërinë e Kosovës vazhdon të ketë 7 ulëse.
Sipas të dhënave të fundit, deri më tani janë numëruar 96.25 për qind e votave, ndërsa procesi ende nuk është përmbyllur plotësisht.
Zëdhënësi i Komisionit Qendror të Zgjedhjeve, Valmir Elezi, ka bërë të ditur se numërimi i votave me postë do të përfundojë gjatë ditës së mërkurë.
