Të dhënat më të fundit të Eurostat për vitin 2025 zbulojnë ndryshime të thella demografike në Bashkimin Evropian: numri i familjeve me fëmijë po zvogëlohet, ndërsa po rritet ndjeshëm numri i personave që jetojnë vetëm ose si çifte pa fëmijë. Nga gjithsej 203,1 milionë familje në BE, vitin e kaluar vetëm 47,4 milionë ose 23,4% përfshinin fëmijë. Pjesën më të madhe e përbëjnë çiftet me fëmijë (14,7%), të ndjekura nga lloje të tjera familjesh me fëmijë (5,6%) dhe prindërit e vetëm (3,0%), përcjell PressOnline.al.
Nga ana tjetër, shumica dërrmuese prej 76,6% janë familje pa fëmijë. Në këtë kategori dominojnë personat që jetojnë vetëm, të cilët përbëjnë 37,5% të të gjitha familjeve në Bashkimin Evropian. Pas tyre vijnë çiftet pa fëmijë me 24,1%.
Tendenca gjatë dekadës së fundit (2016–2025) tregon qartë drejtimin në të cilin po lëviz Europa:
- Numri i familjeve njëanëtarëshe (persona që jetojnë vetëm) është rritur me 19,2%, nga 63,9 milionë në 76,1 milionë.
- Numri i çifteve pa fëmijë është rritur me 3,3%.
- Në të kundërt, numri i çifteve me fëmijë është ulur me 6,3%.
Përqindja më e lartë e familjeve me fëmijë është regjistruar në Sllovaki (35,4%), Irlandë (30,8%) dhe Qipro (28,2%). Në anën tjetër, në Finlandë vetëm 18,2% e familjeve kanë fëmijë, ndërsa situatë të ngjashme kanë edhe Lituania (18,4%) dhe Gjermania (19,9%).
Kur bëhet fjalë për numrin e fëmijëve, gjysma e familjeve evropiane me fëmijë (50,2%) kanë vetëm një fëmijë, 37,6% kanë dy fëmijë, ndërsa vetëm 12,2% rrisin tre ose më shumë fëmijë. Familjet me një fëmijë janë më të përhapura në Portugali (61,8%) dhe Bullgari (60,4%).
Në të kundërt, në 14 nga 27 vendet anëtare të BE-së dominojnë familjet me dy ose më shumë fëmijë, të kryesuara nga Suedia (57,8%) dhe Holanda (57,6%).
Maqedonia e Veriut vazhdon të jetë mbi mesataren evropiane sa i përket familjeve me fëmijë. Sipas Eurostatit, nga gjithsej 595,6 mijë familje në vend, 66,1% (393,4 mijë) janë pa fëmijë, ndërsa 33,9% kanë fëmijë, përcjell PressOnline.al.
Nëse bëhet një krahasim i drejtpërdrejtë me Bashkimin Evropian, ku 76,6% e familjeve janë pa fëmijë dhe 23,4% kanë fëmijë, të dhënat tregojnë se në Maqedoninë e Veriut përqindja e familjeve me fëmijë është dukshëm më e lartë se mesatarja e BE-së. Me këtë përqindje, vendi renditet afër Sllovakisë (35,4%) dhe Irlandës (30,8%), të cilat janë ndër vendet kryesuese në BE.
Ndryshe nga Bashkimi Evropian, ku gjysma e familjeve me fëmijë (50,2%) kanë vetëm një fëmijë, në Maqedoninë e Veriut dominojnë familjet me dy fëmijë (43,4%), ndërsa përqindja e familjeve me tre ose më shumë fëmijë (13,4%) është gjithashtu më e lartë se mesatarja e BE-së (12,2%). (PressOnline.al)
