Rreziku për shëndetin publik nga shpërthimi aktual i Ebola-s në Republikën Demokratike të Kongos është ngritur nga “i lartë” në “shumë i lartë” nga Organizata Botërore e Shëndetësisë (OBSH).
Në një përditësim të premten, drejtori i OBSH-së, Tedros Adhanom Gebrejesus, tha gjithashtu se rreziku në rajonin më të gjerë të Afrikës mbetet “i lartë”, ndërsa globalisht vazhdon të konsiderohet “i ulët”, shkruan BBC, transmeton Dukagjini.
Lloji i rrallë i Ebola-s, i njohur si virusi “Ebola Bundibugyo”, nuk ka një vaksinë të provuar dhe shkakton vdekjen e rreth një të tretës së personave të infektuar. Deri tani, shpërthimi i përqendruar në Kongo ka rezultuar në 177 vdekje të dyshuara dhe 750 raste të dyshuara.
Kjo ndodh në një kohë kur shkencëtarët në Universitetin e Oksfordit në Britaninë e Madhe po zhvillojnë një vaksinë të re që mund të jetë gati për prova klinike brenda dy deri në tre muajve.
Bazuar në të njëjtën teknologji që u përdor për vaksinën anti-Covid të AstraZeneca-s, nuk ka garanci se vaksina do të rezultojë efektive dhe vetëm testimet tek kafshët dhe njerëzit do ta vërtetojnë këtë.
BBC raporton se testimet tek kafshët tashmë kanë nisur në Oksford.
Instituti Serum i Indisë pritet të prodhojë në masë vaksinën kundër Ebola-s sapo Oksfordi të furnizojë materialin mjekësor të nevojshëm.
Një tjetër vaksinë eksperimentale kundër variantit “Bundibugyo” është gjithashtu në zhvillim, por pritet të duhen gjashtë deri në nëntë muaj që doza e parë të jetë gati për testim.
