Këshilli i Sigurimit i OKB-së zhvilloi një mbledhje për situatën në Palestinë, me fokus zbatimin e shpejtë të planit ndërkombëtar për Gazën dhe rezolutës 2803 të vitit 2025.
Përfaqësuesit e OKB-së paralajmëruan se vonesat në zbatimin e marrëveshjeve mund të përkeqësojnë situatën humanitare dhe të rrezikojnë armëpushimin në Gaza.
Përfaqësuesja e Greqisë në OKB, ambasadorja Agni Balta, përshëndeti progresin e deritanishëm, por kërkoi hapa të tjerë konkretë, sidomos në ndihmën humanitare.
Ajo bëri thirrje për çarmatimin e Hamasit dhe grupeve të tjera të armatosura, si dhe për rritjen e ndihmave humanitare dhe tregtare për Gazën. Balta dënoi gjithashtu zgjerimin e vendbanimeve izraelite në Bregun Perëndimor dhe Jerusalemin Lindor, duke theksuar se ato duhet të ndalen menjëherë.
Ndërkohë, përfaqësuesi i OKB-së, Nikolai Mladenov, deklaroi se për herë të parë pas dy vitesh armët janë heshtur në pjesën më të madhe të Gazës dhe se të gjithë pengjet janë kthyer te familjet e tyre.
Megjithatë, ai theksoi se Gaza mbetet larg rikuperimit, pasi rreth 85% e ndërtesave janë dëmtuar ose shkatërruar, ndërsa mbi një milion njerëz vazhdojnë të jenë pa strehim të përhershëm.
Mladenov prezantoi një plan me 15 pika për sigurinë dhe rindërtimin e Gazës, ku çdo hap nga njëra palë do të pasohet nga një hap i palës tjetër. Ai sqaroi se çarmatimi do të bëhet gradualisht dhe nën mbikëqyrje ndërkombëtare.
Sipas tij, grupet palestineze nuk do t’i dorëzojnë armët Izraelit, por një komiteti palestinez që do të administrojë Gazën.
Nga ana tjetër, zyrtari i OKB-së Ramiz Alakbarov paralajmëroi se situata humanitare në territoret palestineze mbetet shumë e rëndë. Ai tha se ndihmat janë ende të pamjaftueshme dhe se plani humanitar prej 4 miliardë dollarësh ka marrë deri tani vetëm 540 milionë dollarë financim.
Ai shtoi se rifillimi i luftimeve në shkallë të gjerë do të kishte pasoja katastrofike, duke theksuar se “populli i Gazës nuk mund të përballojë një tjetër luftë”.
