Bella Hadid ka qenë një nga emrat më të komentuar në tapetin e kuq të Cannes Film Festival, falë një paraqitjeje që u konsiderua si një homazh modern për ikonën legjendare Jane Birkin.
Modelja 29-vjeçare u shfaq në premierën e filmit “La Bataille De Gaulle: L’Âge De Fer” e veshur me një krijim luksoz të firmosur nga “Schiaparelli”, duke tërhequr menjëherë vëmendjen e mediave dhe fansave të modës.
Fustani elegant në nuancë fildishi, i realizuar nga drejtori artistik Daniel Roseberry, spikaste për detajet e punuara me kujdes, qëndisjet e imta dhe dekoltenë e thellë të zbukuruar me një gur të zi në qendër. Look-u plotësohej nga një bisht i gjatë dramatik dhe mëngë elegante, duke krijuar një kombinim mes stilit vintage dhe glamurit modern.
Sipas raportimeve, krijimi kërkoi rreth 22,160 orë punë dhe angazhimin e 130 artizanëve.
Bella zgjodhi ta mbante paraqitjen minimaliste në aksesorë, me vathë diamanti, një unazë elegante dhe flokë të kapura mbrapa, duke i dhënë gjithë vëmendjen fustanit spektakolar.
Shumë kritikë mode dhe përdorues në rrjetet sociale e lidhën menjëherë këtë paraqitje me look-un ikonik që Jane Birkin kishte veshur në Kanë në vitin 1969, sidomos për detajin karakteristik të zi në pjesën e dekoltesë dhe elementët e frymëzuar nga dantella.
Megjithatë, Bella Hadid solli një version më bashkëkohor dhe sensual të këtij frymëzimi klasik, duke e kthyer paraqitjen e saj në një nga momentet më të komentuara të festivalit këtë vit.
Me këtë dalje në tapetin e kuq, modelja konfirmoi edhe një herë pse konsiderohet një nga ikonat më të fuqishme të modës së momentit.
