Një riorganizim i qeverisë së Maqedonisë së Veriut pritet të ndodhë gjatë muajve maj–qershor, sipas paralajmërimeve të Kryeministrit Hristijan Mickoski dhe informacioneve të publikuara nga javorja “Fokus”, përcjell PressOnline.al
Sipas burimeve të kësaj reviste, në mesin e ministrave që pritet pothuajse me siguri të përfshihen në këtë ristrukturim janë Ministri i Sportit, Borko Ristovski, Ministri i Drejtësisë, Igor Filkov dhe Ministri i Kulturës, Zoran Ljutkov.
Siç raporton “Fokus”, pakënaqësia e kryeministrit ndaj Filkovit dhe Ljutkovit ka qenë e pranishme prej kohësh, ndërsa së fundmi janë shtuar edhe vërejtjet ndaj Ristovskit, i cili, ndër të tjera, është përfshirë në përplasje me disa federata sportive.
Nga ana tjetër, megjithëse ishte përfolur për një zëvendësim të mundshëm për shkak të skandaleve në sektorin që drejton, Ministri i Bujqësisë, Cvetan Tripunovski, pritet të mbetet në detyrë. Sipas të njëjtave burime, vlerësimi mbizotërues është se ai nuk ka përgjegjësi direkte për rastet në fjalë dhe se performanca e tij konsiderohet solide.
Përveç ndryshimeve në këta tre sektorë, “Fokus” thekson se riorganizimi mund të shoqërohet edhe me lëvizje të portofoleve ndërmjet partnerëve të koalicionit qeverisës. Një nga opsionet që po shqyrtohet është që VMRO-DPMNE të marrë Ministrinë e Shëndetësisë, ndërsa partneri shqiptar VLEN të përfitojë një nga dikasteret si kultura, arsimi apo një tjetër ministri.
Në këtë skenar, sipas burimeve të “Fokus”, Ministri aktual i Shëndetësisë, Azir Aliu, mund të zëvendësohet nga drejtori i spitalit “8 Shtatori”, Sinisa Stojanoski.
Ndërkohë, koalicioni VLEN, i cili është në proces të shndërrimit në një parti të vetme politike, pritet të ndërmarrë gjithashtu ndryshime të thella në përbërjen e tij qeveritare pas finalizimit të këtij procesi në muajin maj. Sipas një zyrtari të këtij koalicioni, ekziston një klimë për zëvendësimin e shumicës së ministrave dhe zëvendësministrave aktualë.
Në këtë kuadër, përveç Aliut, në listën e mundshme të ndryshimeve përmendet edhe Ministri i Ekonomisë dhe Çështjeve Sociale, Fatmir Limani.
Megjithatë, disa nga figurat kryesore të qeverisë, përfshirë Aleksandar Nikoloskin (Transport), Pançe Toshkovskin (Punët e Brendshme), Timço Mucunskin (Punët e Jashtme), Vlado Misajlovskin (Mbrojtje) dhe Gordana D. Koçoskën (Financa), pritet të vijojnë detyrën e tyre deri në zgjedhjet e ardhshme parlamentare.
Sipas deklarimeve zyrtare, zgjedhjet pritet të mbahen në vitin 2028, ndërsa opozita nuk përjashton mundësinë e zgjedhjeve të parakohshme në vitin 2027.(PressOnline.al)
