Ylli i muzikës pop Britney Spears është arrestuar këtë javë në Westlake Village, California nën dyshimin për drejtim automjeti nën ndikimin e alkoolit.
Sipas raportimeve të TMZ, në makinën e saj janë gjetur edhe pilula të dyshuara, të cilat aktualisht po analizohen në laborator për të përcaktuar nëse përmbajnë substanca narkotike.
Në rast se rezultatet konfirmojnë praninë e drogës, këngëtarja mund të përballet me akuza shtesë si posedim i substancave narkotike dhe drejtim mjeti nën ndikimin e tyre, një shkelje e njohur si DUID.
Sipas ekspertëve ligjorë të Kann California Law Group, këto akuza mund të sjellin dënime që variojnë nga 48 orë deri në më shumë se një vit burg, si dhe gjoba të larta dhe pezullim të patentës.
Megjithatë, avokati Tre Lovell deklaroi për Daily Mail se nëse pilulat rezultojnë të mos përmbajnë substanca të ndaluara, Spears ka shumë pak gjasa të përballet me burgim.
Ai shtoi se në rastet kur nuk ka aksident, dëme materiale apo nivele shumë të larta alkooli në gjak, dhe nëse bëhet fjalë për shkeljen e parë të këtij lloji, zakonisht vendoset provë ligjore, gjobë, ndjekje e kurseve edukative dhe pezullim i patentës.
Aktualisht, autoritetet janë në pritje të rezultateve laboratorike dhe do të analizojnë të gjitha rrethanat e rastit për të vendosur nëse do të ngrihen akuza dhe çfarë mase ligjore do të merret ndaj Britney Spears.
