Ato zakonisht janë baza e një veshjeje, por tani sutjenat po kalojnë nga të qenit të padukshme në një pjesë të dukshme të look-ut. Sutjenat e thjeshta dhe pa qepje për bluzat e ngushta po dalin nga moda, duke u zëvendësuar me modele prej dantelle, tyli dhe rrjete.
M&S, marka e njohur për të brendshme praktike, po promovon një estetikë më sensuale për pranverën. Kjo markë mban 38.2% të tregut të sutjenave në Mbretërinë e Bashkuar dhe vetëm në vitin 2023 shiti mbi 20 milionë copë, me klientët nën moshën 30 vjeç që përbënin gati një të tretën e blerjeve.
“Rikthimi i dantellës”
Soozie Jenkinson, drejtoresha e dizajnit për të brendshme, shpjegon: “Për vite me radhë, sutjena më e kërkuar ishte ajo e përshtatshme për bluzat e ngushta, por tani dantella po rikthehet në vëmendje.”
Edhe pse këto sutjena nuk janë krijuar posaçërisht për t’u ekspozuar, popullariteti i tyre shënon një largim të qartë nga modeli klasik që synonte të zhdukej poshtë rrobave.
Në muajt e fundit, kemi parë rikthimin e trendit të viteve 2000 me ekspozimin e tangave mbi pantallona, boksere të dukshëm mbi bel dhe pantallona të brendshme të veshura si pantallona të zakonshme. Tani, ky fenomen po zhvendoset më lart në trup.
Edhe shtëpitë e mëdha të modës po e përqafojnë këtë tendencë. Në Javën e Modës në Paris, Dior kombinoi sutjena prej dantelle me fustane të tejdukshëm, ndërsa Sarah Burton, në debutimin e saj për Givenchy, prezantoi veshje prej rrjete me sutjena të integruara në dizajn.
Nga ana tjetër, Miu Miu – marka që popullarizoi ekspozimin e të brendshmeve vite më parë – këtë sezon paraqiti fustane dhe bluza që dukeshin sikur rrëshqisnin nga trupi i modeleve, duke ekspozuar sutjenat e tyre. Disa modele veshën edhe sutjena në stilin ikonë “bullet bra” nën bluza të holla prej mëndafshi apo triko të lehta.
Një zgjidhje për të pavendosurit
Për ata që nuk janë ende gati për ta përqafuar plotësisht këtë trend, marka amerikane Vaquera ofron një alternativë të ndërmjetme. Bluzat e tyre me jakë të rrumbullakët kanë një dizajn optik (trompe l’œil) që krijon iluzionin e një sutjene dantelle të zezë të vizatuar mbi bluzë. Dhe po, mund të vishet edhe me një sutjenë klasike për bluzat e ngushta poshtë saj./Living.al
