Familja e artistes kosovare Rinesa Qeriqi, e njohur me emrin artistik Rinesancë, ka njoftuar detajet e homazheve në nderim të saj, pas ndarjes së parakohshme nga jeta në moshën 25-vjeçare.
Sipas njoftimit të familjarëve, homazhet do të mbahen të dielën, më 25 tetor, duke filluar nga ora 17:00, në ambientet e Erb&Good, në adresën 171 King Street South, Waterloo, Ontario, Kanada.
Familja ka bërë të ditura këto detaje për të gjithë ata që dëshirojnë të marrin pjesë dhe t’i japin lamtumirën e fundit artistes së re.
Lajmi për vdekjen e Rinesës u bë i ditur më 23 tetor nga motra e saj, Drenisa, e cila ndau një mesazh prekës në rrjetet sociale, duke shprehur dhimbjen e thellë të familjes.
Mëngjesi i sotëm na erdhi pa ty, Rina jonë. Do të mbetesh gjithmonë në zemrat tona, deri në përjetësi. Të duam fort, unë, mami, babi, Buna e Froni. Pusho e qetë, shpirti i bardhë
-shkroi ajo.
Rinesa Qeriqi ishte këngëtare dhe tekstshkruese, e njohur për muzikën hip-hop dhe rap, si dhe për tekstet personale që pasqyronin përjetimet e saj.
Ajo u bë e njohur për një pjesë të publikut edhe përmes rolit të Leas në videoklipin e këngës së Alban Skënderajt, të publikuar në vitin 2018. Në dhjetor të vitit 2025, ajo publikoi albumin me 12 këngë, “Muzikë Mbijetese”.
Artistja ishte diagnostikuar me tumor në tru në vitin 2025 dhe kishte kaluar një periudhë të vështirë trajtimi.
Ndarja e saj nga jeta ka prekur familjarët, miqtë dhe kolegët e skenës muzikore shqiptare, të cilët kanë shprehur ngushëllimet dhe kanë kujtuar talentin e saj.
Rinesa do të kujtohet për muzikën, guximin dhe gjurmën që la në jetën e atyre që e njohën dhe e ndoqën.
