Supermodelja e njohur britanike, Kate Moss, ka tërhequr vëmendjen e mediave gjatë një dreke në Londër, duke shfaqur stilin e saj karakteristik dhe një pamje të relaksuar.
Megjithatë, kjo dalje e saj ndodh në një kohë kur marrëdhënia me motrën e saj më të vogël, Lottie Moss, është rikthyer në qendër të vëmendjes për shkak të tensioneve të vazhdueshme mes tyre.
Kate, 52 vjeçe, u fotografua duke drekuar e vetme në restorantin e njohur Lemonia, në veri të Londrës. Ajo dukej elegante, duke shfletonte një revistë Louis Vuitton dhe duke mbajtur me vete dy cigare elektronike.
Për këtë rast, ajo kishte zgjedhur një xhaketë të zezë Dior Cannage, e kombinuar me xhinse Levi’s Orange Tab. Pamjen e saj e kompletoi me syze dielli, çizme të zeza dhe një çantë luksoze Bottega Veneta.
Gjatë qëndrimit në restorant, Kate u fotografua gjithashtu duke biseduar në telefon, duke theksuar se ajo mbetet një figurë e njohur dhe e kërkuar në publik.
Ndërkohë, motra e saj më e vogël, Lottie, 28 vjeçe, ka bërë disa deklarata të forta në lidhje me marrëdhënien e tyre, duke e përshkruar atë si të ftohtë dhe të ndarë.
Lottie Moss: “Motra ime nuk dëshiron të ketë asgjë me mua”
Gjatë një interviste për podkastin “Olivia’s House”, Lottie ka folur hapur për ndjenjat e saj në lidhje me marrëdhënien me Kate, duke theksuar se ajo ndjehet shpesh e lënduar nga mungesa e vëmendjes së motrës së saj.
Influencuesja ka pranuar se marrëdhënia e tyre është pothuajse inekzistente, duke shpjeguar se, gjatë fëmijërisë, ajo ka ndjerë mungesë të madhe nga ana e Kate.
“Marrëdhënia me motrën time është një çështje mjaft e ndërlikuar dhe zakonisht nuk flas për të. Ajo është Kate Moss dhe nuk dua ta mërzis. Por, në të njëjtën kohë, kjo është edhe jeta ime dhe unë kam përvojat e mia me të”, ka thënë Lottie.
Ajo ka theksuar se përpjekjet e saj për të krijuar një lidhje më të ngushtë me Kate nuk kanë pasur sukses, duke e bërë atë të ndihet e braktisur.
“Ne praktikisht nuk kemi marrëdhënie dhe nuk mendoj se është faji i dikujt. Jemi rritur në periudha të ndryshme. Kur unë linda, Kate ishte 24 vjeçe dhe tashmë kishte jetën e saj”, ka shpjeguar ajo.
Lottie ka rrëfyer se si, kur ishte më e vogël, e admironte shumë motrën e saj dhe ëndërronte një marrëdhënie më të afërt me të.
“Kur e shihja duke punuar si modele, mendoja se ishte njeriu më fantastik në botë. Doja shumë të kishim një lidhje si motra, por sa herë i dërgoja mesazhe apo e telefonoja, nuk merrja përgjigje”, ka treguar ajo.
Sipas Lotties, kjo situatë e kishte bërë të ndihej e hidhëruar dhe në siklet, sidomos kur njerëzit e pyesnin vazhdimisht për Kate.
“Të gjithë më pyesnin se si ishte Kate apo çfarë më kishte dhuruar. Unë nuk e dija përgjigjen. Mund t’i shkruanin vetë”, ka thënë ajo.
Megjithatë, Lottie thekson se me kalimin e viteve ka mësuar ta pranojë këtë realitet dhe të gjejë mbështetje emocionale te miqtë e saj.
“Familja është shumë e rëndësishme për mua, por kam kuptuar se edhe miqtë mund të bëhen familja jote. Nuk kam më nevojë ta kërkoj me çdo kusht atë marrëdhënie”, ka shtuar ajo.
Nga afërsia familjare te konfliktet për mënyrën e jetesës
Kate dhe Lottie Moss kanë të njëjtin baba, Peter Moss, por nëna të ndryshme. Kate dhe vëllai i saj Nick lindën nga martesa e parë e Peter me Linda Shepherd. Pas divorcit të çiftit në vitin 1987, Peter u martua me Inger Solnordal, me të cilën pati Lottien në vitin 1998.
Pavarësisht diferencës prej 24 vjetësh, marrëdhënia mes dy motrave nuk ka qenë gjithmonë e ftohtë. Lottie kishte qenë madje shoqëruese e nuses në dasmën e Kate, ndërsa gjatë pandemisë së COVID-19 kishte qëndruar për një periudhë në rezidencën e supermodeles në Cotswolds.
Megjithatë, sipas raportimeve të mediave britanike, pikërisht gjatë asaj kohe nisën të shfaqeshin mosmarrëveshje serioze mes tyre.
Burime të cituara nga “Page Six” kanë pretenduar se Kate ishte e pakënaqur me mënyrën e jetesës së motrës së saj, veçanërisht me konsumimin e alkoolit, përdorimin e raportuar të drogës dhe publikimet provokuese në rrjetet sociale.
“Kate ishte e frustruar sepse Lottie dëshironte vazhdimisht të pinte alkool dhe publikonte përmbajtje provokuese në Instagram”, kishte deklaruar një burim për median amerikane.
Sipas të njëjtit burim, supermodelja nuk ndihej rehat pranë personave që konsumonin shumë alkool apo përdornin kokainë.
Ironikisht, vetë Kate Moss ka pasur një të kaluar të trazuar, të shoqëruar me festa dhe skandale që kanë dominuar mediat për vite me radhë.
Në vitin 2005, ajo u përfshi në një skandal të madh pasi u publikuan fotografi ku dukej se përdorte kokainë, gjatë periudhës kur ishte në lidhje me muzikantin Pete Doherty.
Në atë kohë, mediat britanike i vendosën nofkën “Cocaine Kate”. Supermodelja ishte gjithashtu e njohur për jetën intensive të natës dhe konsumimin e alkoolit, duke fituar mes miqve edhe pseudonimin “The Tank”.
Megjithatë, vitet e fundit, Moss ka ndryshuar ndjeshëm stilin e jetesës, duke iu përkushtuar jogës, mirëqenies personale dhe një rutine më të qetë.
Sipas raportimeve, dallimet në stilin e jetës kanë ndikuar në përkeqësimin e marrëdhënies mes dy motrave. Kur Lottie u largua nga shtëpia e Kate gjatë pandemisë, thuhet se la pas dy shishe të verës së preferuar të motrës, gjest që u interpretua si shprehje pakënaqësie.
Ribashkimi familjar që ngriti pikëpyetje
Pavarësisht deklaratave të Lotties për mungesën e një marrëdhënieje të afërt, dy motrat janë parë së fundmi së bashku gjatë festimeve familjare.
Muajin e kaluar, Kate dhe Lottie morën pjesë në një drekë për ditëlindjen e 80-të të babait të tyre, Peter Moss, në pubin “The Griffin”, në Sussex.
Fotografitë e publikuara në rrjetet sociale nga vëllai i tyre Nick treguan dy motrat duke pozuar së bashku me familjen, duke nxitur spekulime se ato mund t’i kenë lënë pas mosmarrëveshjet që, sipas mediave, kanë zgjatur për rreth tre vjet.
Megjithatë, deklaratat e fundit të Lotties sugjerojnë se, pavarësisht pjesëmarrjes së përbashkët në ngjarje familjare, raporti mes tyre mbetet i largët. Ndërsa Kate Moss vazhdon të ruajë statusin e saj si një nga figurat më ikonike të industrisë së modës, motra e saj më e vogël duket e vendosur të ndërtojë identitetin dhe karrierën e vet, pa jetuar vazhdimisht nën hijen e famës së supermodeles.
