Presidenti amerikan Donald Trump ka deklaruar se Shtetet e Bashkuara mund të shqyrtojnë përfshirjen në sulmet kundër rebelëve Huthi të Jemenit, pas goditjes së përgjakshme ndaj Aeroportit Ndërkombëtar “Mbreti Khalid” në Riad, ku të paktën 12 persona u vranë dhe mbi 300 të tjerë u plagosën.
Trump bëri të ditur se planifikon të zhvillojë një bisedë me princin e kurorës saudite, Mohammed bin Salman, pas sulmit që tronditi kryeqytetin saudit.
I pyetur nga gazetarët nëse Uashingtoni mund t’i bashkohet operacioneve ushtarake saudite kundër Huthive, presidenti amerikan la të hapur këtë mundësi.
“Mund të ndodhë. Do ta shikojmë. Sapo mësuam për sulmin e fundit, kështu që do të marrim një vendim. Ata janë në gjendje të mbrojnë. Sauditët janë luftëtarë të mirë. Por mendoj se sulmi ishte një gjë e tmerrshme”, tha Trump.
Sulmi i së shtunës, për të cilin autoritetet saudite fajësojnë rebelët Huthi, të mbështetur nga Irani, konsiderohet goditja më vdekjeprurëse ndaj Arabisë Saudite në më shumë se një dekadë.
Sipas autoriteteve, shpërthimi shkaktoi viktima dhe dëme në terminalin e pasagjerëve, ndërsa operacionet në aeroport u pezulluan përkohësisht dhe fluturimet u devijuan.
Sekretari amerikan i Shtetit, Marco Rubio, konfirmoi se një shtetas amerikan ishte mes viktimave dhe dënoi sulmin, duke e cilësuar atë si një shpërfillje të hapur ndaj jetës së civilëve të pafajshëm.
