Pas viteve të dominuara nga gel-i, nail art-i dhe manikyrët gjithnjë e më kompleksë, industria e bukurisë po eksperimenton edhe me të kundërtën: thonj që duken të rregulluar, por pa manikyr tradicional. Katia Beauchamp, bashkëthemeluesja e Birchbox, po rikthehet në beauty me Buff Beauty, një markë që fokusohet te kujdesi dhe shkëlqimi i thoit natyral në vend që ta mbulojë atë me ngjyrë. Marka u lançua online gjatë verës dhe tashmë ka hyrë në më shumë se 600 pika Target Beauty Studio.
Ideja është relativisht e thjeshtë: në vend të procesit polish–tharje–heqje apo ciklit të gel-it, produktet dhe mjetet synojnë që vetë sipërfaqja natyrale e thoit të duket më e rregulluar dhe e lustruar. Është një koncept që përshtatet me një pjesë të tendencave aktuale të beauty-t, ku konsumatorët kërkojnë rutina më fleksibël dhe rezultate që kërkojnë më pak mirëmbajtje.
Lëvizja është interesante edhe për shkak të historisë së Beauchamp. Birchbox ishte një nga kompanitë që ndihmoi në popullarizimin e modelit të kutive mujore me mostra bukurie, duke u dhënë konsumatorëve mundësinë të provonin vazhdimisht produkte të reja. Me Buff Beauty, qasja duket pothuajse e kundërt: jo më shumë produkte dhe eksperimente, por një zgjidhje më e thjeshtë për një pjesë shumë specifike të rutinës. Beauchamp ka thënë se po përdor edhe mësimet nga bizneset e mëparshme, veçanërisht rëndësinë e të kuptuarit të konsumatorit dhe të krijimit të produkteve që justifikojnë çmimin e tyre.
Kjo nuk do të thotë se gel-i apo nail art-i po zhduken. Por beauty funksionon shpesh me cikle: sa më kompleks të bëhet një ritual, aq më shumë krijohet hapësirë për një alternativë që premton thjeshtësi. E kemi parë në skincare me rutinat më të shkurtra dhe në makeup me estetikën “no-makeup”; tani i njëjti mentalitet mund të jetë duke mbërritur edhe te thonjtë.
