Selena Gomez nuk ka ndërmend të rikthehet pas në kohë vetëm për t’iu përshtatur pritshmërive të publikut. Në një intervistë të re për People, këngëtarja dhe aktorja foli hapur për plakjen, ndryshimin e stilit të saj dhe nostalgjinë e fansave për versionin e saj të vitit 2016.
Fotografitë e Gomez nga ajo periudhë vazhdojnë të rikthehen vazhdimisht në rrjetet sociale, veçanërisht ato ku ajo shfaqet me look-un karakteristik me “smoky eye”. Por, sipas vetë artistes, disa njerëz duket se duan ta “ngrijë” në atë periudhë dhe ta shohin gjithmonë njësoj.
Duhet të jem e sinqertë, rikthimet e vitit 2016 dhe gjithçka rreth tyre janë shumë argëtuese, por njerëzit bëhen vërtet intensivë. Gjithmonë bëj shaka se mendoj që njerëzit duan të më ngrijnë në kohë në atë periudhë të jetës sime
-tha Gomez.
Ajo pranoi se 2016 ishte një periudhë shumë e ngarkuar për të. Në atë kohë, Selena ishte vetëm 23 vjeçe dhe ndodhej në një nga fazat më të ekspozuara të karrierës së saj. Albumi “Revival” kishte sjellë disa prej hiteve të saj më të mëdha, ndërsa ajo ishte gjithashtu ndër personazhet më të ndjekura në Instagram.
Duke kujtuar pamjen e asaj kohe, Gomez foli edhe për grimin që u bë një nga karakteristikat e saj të asaj periudhe.
Sigurisht që duhej të bëja smoky eye. Po përpiqesha të dukesha cool!
-tha ajo me humor, duke shtuar se sot e përdor ende këtë stil, por në një mënyrë tjetër.
Mesazhi i saj për ata që presin rikthimin e asaj Selena-s ishte i qartë: ajo ka ndryshuar dhe nuk ka ndërmend të ndalojë kohën.
Unë mendoj se njerëzit gjithmonë duan që të dukem siç dukesha atëherë, dhe kjo thjesht nuk do të ndodhë. Ndonjëherë njerëzve nuk u pëlqen pamja e bukurisë natyrale, por kjo është pikërisht ajo që përfaqëson identitetin tim tani, të lidhem më shumë me bukurinë natyrale
-u shpreh ajo.
34-vjeçarja tha gjithashtu se nuk e tremb aspak plakja. Përkundrazi, ajo e përshkroi këtë fazë të jetës si diçka që po e shijon.
Të plakesh ka qenë shumë argëtuese. Nuk kam aspak frikë. Më pëlqen të plakem
-tha Gomez, duke pranuar me humor se me kalimin e viteve trupi ndryshon, por theksoi se për sa kohë je gjallë, mosha mbetet vetëm një numër.
Në intervistë, Selena foli edhe për motrën e saj 13-vjeçare, Gracie, për të cilën tha se ka shumë më tepër vetëbesim sesa kishte ajo në atë moshë.
Ndërkohë, sot Gomez është në një fazë tjetër të jetës, si në aspektin profesional, ashtu edhe personal. Ajo është themeluese e Rare Beauty dhe vazhdon të fokusohet te një qasje më natyrale ndaj bukurisë, ndërsa puna e saj për shëndetin mendor është bërë një pjesë e rëndësishme e imazhit dhe angazhimit të saj publik. Fondi Rare Impact ka mbledhur më shumë se 30 milionë dollarë për organizata që mbështesin shëndetin mendor të të rinjve.
Në fund, duket se Selena Gomez nuk është e interesuar të rikrijojë veten e vitit 2016. Ajo mund t’i shijojë kujtimet dhe nostalgjinë e fansave, por versioni i saj i sotëm është pikërisht ai që dëshiron të jetë.
