Vetëm pak ditë pasi u përjashtua nga turneu i Ed Sheeran pas deklaratave të tij publike në mbështetje të Palestinës, Macklemore ka njoftuar se do të dhurojë të gjithë shumën prej 1 milion dollarësh që fitoi nga pjesëmarrja në turne për organizata që ndihmojnë popullin palestinez.
Reperi amerikan e bëri të ditur vendimin përmes një deklarate në Instagram, ku tha se dëshiron që vëmendja të rikthehet te njerëzit që po përballen me pasojat e luftës dhe krizës humanitare në Gaza.
Me gjithçka që ka ndodhur gjatë 48 orëve të fundit, dua ta rikthej bisedën aty ku duhet të jetë: te populli palestinez
-shkroi Macklemore, duke njoftuar se do të dhurojë të gjithë fitimin e tij neto prej 1 milion dollarësh nga “Loop Tour” për gjashtë organizata që punojnë drejtpërdrejt në mbështetje të palestinezëve.
Fondet do të shkojnë për Palestine Children’s Relief Fund, HEAL Palestine, Gaza Soup Kitchen, Medical Aid for Palestinians, UNRWA USA National Committee dhe Anera.
Por Macklemore nuk u ndal vetëm te njoftimi për donacionin. Ai i bëri një sfidë publike edhe Robert Kraft, pronarit të New England Patriots dhe Gillette Stadium, i cili kishte kundërshtuar performancën e reperit në stadiumin e tij.
Macklemore e ftoi Kraft-in që të përputhë donacionin e tij prej 1 milion dollarësh, duke argumentuar se, pavarësisht mosmarrëveshjeve mes tyre, mund të bien dakord për rëndësinë e mbrojtjes së jetëve palestineze.
Një jetë palestineze nuk është më pak e vlefshme se çdo jetë tjetër në këtë tokë
-shkroi reperi në deklaratën e tij.
Macklemore u largua nga pjesa e mbetur e turneut të Ed Sheeran pasi gjatë një koncerti në MetLife Stadium në New Jersey shprehu publikisht mbështetjen për Palestinën dhe bëri thirrje për “Free Palestine”. Pas kësaj, disa prej ambienteve ku ishin planifikuar koncertet e ardhshme kundërshtuan vazhdimin e tij si artist mbështetës.
Ed Sheeran ka deklaruar se vendimi për largimin e Macklemore nuk ishte i tij, por i promovuesit dhe ambienteve ku do të zhvilloheshin koncertet. Sipas Sheeran, disa stadiume kishin paralajmëruar se do të anulonin shfaqjet nëse Macklemore do të vazhdonte të ishte pjesë e turneut.
Pas largimit të reperit, polemika u zgjerua edhe më tej. Artistët Finneas, Lukas Graham, Aaron Rowe dhe Beoga njoftuan se nuk do të merrnin pjesë në pjesën e mbetur të turneut, në shenjë solidariteti me Macklemore.
Në deklaratën e tij të fundit, Macklemore theksoi se donacioni nuk duhet të shihet si diçka që e vendos atë në qendër të historisë.
Ai tha se dëshiron të fokusohet te prindërit që përballen me humbjen e fëmijëve, mjekët, gazetarët, punonjësit humanitarë dhe aktivistët që vazhdojnë të punojnë në kushte të vështira.
