Liam Neeson ka ndezur thashethemet për një romancë të re, pasi u shfaq tepër i afërt me aktoren Stella Stocker në Festivalin Ndërkombëtar të Filmit në Toronto.
Aktori 74-vjeçar dhe Stocker u shfaqën së bashku në tapetin e kuq të premierës së filmit “Evil Genius”, ku nuk kaloi pa u vënë re fakti se të dy ecën dorë për dore dhe qëndruan pranë njëri-tjetrit gjatë pozimit para fotografëve. Në një moment, aktorja shihet edhe duke i kapur dhe shtrënguar lehtë krahun Neesonit.
Pamjet mjaftuan që fansat të nisnin menjëherë të spekulonin nëse mes dy aktorëve ka diçka më shumë se një miqësi apo marrëdhënie profesionale. Megjithatë, as Neeson dhe as Stocker nuk kanë konfirmuar se janë në një lidhje romantike dhe përfaqësuesit e tyre nuk kanë komentuar publikisht mbi thashethemet.
Neeson dhe Stocker nuk janë të panjohur për njëri-tjetrin. Dyshja ka punuar së bashku në filmat “Memory” dhe “Marlowe”, të dy të publikuar në vitin 2022. Tani ata do të shfaqen sërish krah për krah në filmin aksion-triller “The Mongoose”, i cili pritet të dalë në kinema më 30 tetor.
Në filmin e ri, Neeson interpreton Ryan “Fang” Flanagan, një burrë që akuzohet për një krim që nuk e ka kryer dhe përfundon në arrati. Stocker luan personazhin e Helene, ndërsa në kast janë edhe Marisa Tomei dhe Ving Rhames.
Shfaqja e tyre e afërt në Toronto vjen vetëm një vit pasi jeta sentimentale e Neesonit u bë sërish objekt i vëmendjes mediatike. Aktori u lidh romantikisht me Pamela Anderson, me të cilën luajti në “The Naked Gun”.
Anderson konfirmoi më vonë se ata kishin pasur një lidhje të shkurtër pasi përfunduan xhirimet e filmit, duke treguar se kishin kaluar edhe një periudhë intime së bashku.
Liam dhe unë ishim të përfshirë romantikisht për një kohë të shkurtër, por vetëm pasi përfunduam xhirimet
-kishte deklaruar ajo për PEOPLE.
Romanca me Anderson nuk zgjati, por dyshja mbeti në marrëdhënie të mira. Tani, Neeson është sërish në qendër të thashethemeve sentimentale, këtë herë për shkak të afrimit me një tjetër kolege.
Sa i përket Stocker, aktorja britanike ka një karrierë në rritje dhe ka marrë pjesë edhe në produksione të njohura si “The Batman”, “Mission: Impossible – Rogue Nation” dhe seriali “Archie”. Mosha e saj nuk është bërë publike.
Neeson, ndërkohë, ishte i martuar me aktoren Natasha Richardson nga viti 1994 deri në vdekjen e saj në vitin 2009. Çifti kishte dy djem. Pas Richardson, aktori pati një lidhje me drejtuesen e marrëdhënieve me publikun Freya St. Johnston, ndërsa jeta e tij private ka qenë përgjithësisht larg vëmendjes mediatike.
