Ekipi ligjor i Elon Musk ka kërcënuar me ndërmarrjen e veprimeve ligjore ndaj producentëve të dokumentarit “Musk”, me regji të Alex Gibney, duke pretenduar se filmi përmban deklarata potencialisht shpifëse dhe krijon një narrativë të rreme për rolin e miliarderit në zgjedhjet presidenciale amerikane të vitit 2024.
Avokati i Musk, Alex Spiro, i ka dërguar një letër kompanisë së prodhimit Jigsaw, duke akuzuar ekipin e dokumentarit se kishte refuzuar t’i jepte Musk dhe përfaqësuesve të tij mundësinë për të reaguar ndaj materialeve të filmit.
Ky projekt nuk filloi si një hetim. Filloi me një përfundim
-shkroi Spiro në letër, sipas raportimeve.
Ai kërkoi gjithashtu që producentët të ruajnë të gjitha materialet që lidhen me dokumentarin, përfshirë pamjet e papublikuara, intervistat, dokumentet kërkimore, materialet e verifikimit të fakteve dhe komunikimet me burimet.
Një nga çështjet kryesore të ngritura nga avokati lidhet me një pjesë të dokumentarit ku Ashley St. Clair, ish-partnerja e Musk, flet për mesazhe që ai i kishte dërguar para zgjedhjeve të nëntorit 2024.
Në dokumentar, St. Clair tregon se Musk i kishte shkruar se do të aktivizonte “lasers” nga hapësira dhe se kishte mbi 10 mijë lazerë në hapësirë. Ajo pyetet nëse ai po i referohej Starlink, por përgjigjet se nuk e di se çfarë tjetër mund të nënkuptonte. Mesazhet janë autentikuar nga NPR.
Spiro argumenton se mënyra se si është montuar kjo pjesë mund të krijojë përshtypjen se Musk kishte përdorur Starlink për të ndikuar në numërimin e votave. Ai thekson se Starlink nuk ishte i lidhur me sistemet e numërimit të votave dhe se pretendimet për manipulim të zgjedhjeve përmes satelitëve ishin hedhur poshtë më herët.
Nga ana tjetër, kompania Jigsaw ka mbrojtur punën e Gibney, duke argumentuar se shqyrtimi kritik i figurave të fuqishme publike dhe gazetaria e bazuar në fakte mbrohen nga Amendamenti i Parë i Kushtetutës amerikane.
Vetë Gibney ka thënë se Musk kishte refuzuar të intervistohej për dokumentarin. Filmi, i cili zgjat gati katër orë, përfshin dëshmi nga persona të afërt me të, mes tyre ish-bashkëshortja Justine Musk, ish-partnerja Ashley St. Clair, babai i tij Errol Musk dhe bashkëthemeluesi i Tesla-s, Martin Eberhard.
Musk, ndërkohë, e ka kritikuar publikisht dokumentarin, duke e cilësuar si një “hit piece” dhe duke sulmuar ashpër regjisorin Alex Gibney.
Deri tani bëhet fjalë për kërcënim për veprime ligjore dhe njoftim formal, jo për një padi të konfirmuar si të ngritur në gjykatë. Dokumentari pritet të shfaqet në kinematë amerikane më 16 tetor.
