Pak para se të marrë çmimin Luani i Artë për Arritje Jetësore, George Clooney ka shijuar një mbrëmje romantike me bashkëshorten e tij, Amal, në një prej vendeve më të veçanta për çiftin në Venecia.
Amal, 48 vjeçe, u shfaq elegante me një fustan të bardhë, i cili të kujtonte një veshje me thekë nga Giambattista Valli, që ajo kishte veshur një vit më parë në të njëjtin qytet.
Çifti darkoi në Aman Venice, hotelin luksoz ku George dhe Amal zhvilluan edhe dasmën e tyre madhështore në vitin 2014.
Avokatja e njohur për të drejtat e njeriut dukej në humor të mirë teksa doli nga hoteli krah bashkëshortit të saj. Më pas, çifti u drejtua drejt një taksie uji për të vazhduar mbrëmjen në Venecia.
George, 65 vjeç, zgjodhi një kostum gri për mbrëmjen.
I vendosur buzë kanalit, Aman Venice ndodhet në Palazzo Papadopoli, një pallat rreth 450-vjeçar. Hoteli u hap në vitin 2013 dhe është kthyer në një prej hoteleve më luksoze të qytetit.
Pikërisht aty, në vitin 2014, George dhe Amal kurorëzuan martesën e tyre në një ceremoni ku morën pjesë shumë prej emrave të njohur të Hollywoodit.
Pjesëmarrja e Clooney në Festivalin e Filmit në Venecia këtë vit ka një simbolikë të veçantë. Aktori do të nderohet me Luanin e Artë për Arritje Jetësore.
Ironikisht, vetëm një vit më parë ai ishte në festival për të promovuar filmin “Jay Kelly”, ku interpreton një yll kinemaje që udhëton drejt Italisë për të marrë një çmim për arritje jetësore.
Këtë vit, duket sikur jeta po imiton artin, pasi vetë Clooney do të marrë këtë vlerësim prestigjioz në ditën e hapjes së festivalit.
Pothuajse 30 vite pasi mori pjesë për herë të parë në Festivalin e Venecias me filmin “Out of Sight”, Clooney është shndërruar në një prej figurave më të njohura të eventit.
Venecia ka qenë gjithashtu skenë e disa prej momenteve më të rëndësishme të jetës dhe karrierës së tij, nga martesa me Amal te premiera e “Good Night, and Good Luck”, filmi që ai bashkëshkroi dhe në të cilin luajti, duke marrë edhe nominimin e parë për Oscar si regjisor.
Edicioni i këtij viti nis të mërkurën me premierën e “Ink”, nga regjisori britanik Danny Boyle, ndërsa festivali do të përmbyllet më 12 shtator me filmin italian “Dio Ride” (“God Laughs”), shkruar dhe drejtuar nga Giovanni Veronesi.
Mes emrave që pritet të marrin pjesë janë Noel dhe Liam Gallagher, Rooney dhe Kate Mara, Robert Pattinson, Penélope Cruz, Javier Bardem, Pamela Anderson, Sam Rockwell, John Malkovich dhe Louis Garrel.
Në festival pritet të jetë edhe aktorja koreano-jugore Cho Yeo-jeong dhe aktorja amerikane Ellen Burstyn, e cila gjithashtu do të nderohet me një çmim për Arritje Jetësore.
Ndërkohë, familja Clooney ka përjetuar një situatë shqetësuese gjatë verës, pasi rezidenca e tyre në Brignoles, në Provence-Alpes-Côte d’Azur, u kërcënua nga zjarret e fuqishme që përfshinë disa zona të Francës.
Përfaqësuesi i aktorit konfirmoi në atë kohë se George, Amal dhe familja e tyre ishin detyruar të evakuonin shtëpinë.
Në një letër drejtuar kryetarit të bashkisë së Brignoles, Didier Brémond, Clooney shprehu shqetësimin për qytetin dhe premtoi mbështetjen e tij për komunitetin.
Në këtë pikë nuk kemi asnjë ide nëse shtëpia jonë e bukur do t’i mbijetojë këtij momenti të tmerrshëm
-kishte shkruar aktori.
Ai shtoi se, gjatë evakuimit, shpresonte që kryetari dhe banorët e qytetit të ishin të sigurt dhe theksoi angazhimin e tij dhe Amal për të ndihmuar komunitetin të rimëkëmbej.
Ne e duam Brignoles dhe miqtë tanë që jetojnë atje
-kishte përfunduar Clooney.
