Bella Hadid dhe motra e saj, Gigi Hadid, kanë bashkuar sërish forcat në një projekt mode, këtë herë për fushatën e re të markës “Guest In Residence”.
Modelja 29-vjeçare u shfaq me një stil të frymëzuar nga Perëndimi amerikan, duke kombinuar këmisha, xhinse, çizme dhe kapele kauboji.
Në disa prej fotografive, Bella dhe Gigi pozojnë së bashku në një ambient rural, mes kuajve, duke krijuar një atmosferë tipike western.
Bella zgjodhi një këmishë kafe me vija të kuqe, të kombinuar me një kapelë në të njëjtën nuancë. Në një tjetër pamje, ajo u shfaq me këmishë të bardhë, xhinse blu dhe kapelë të bardhë.
Ndërkohë, Gigi solli një tjetër interpretim të stilit kauboj, me një xhaketë blu me kuadrata dhe pantallona të bardha.
Dita perfekte për vajzat
-shkroi Bella krahas fotografive të publikuara në rrjetet sociale, duke treguar edhe një herë lidhjen e ngushtë që ka me motrën e saj.
Fushata e re vjen pas një periudhe të ngarkuar për Bella Hadid, e cila së fundmi u bë edhe ambasadore e markës “Alo” për fushatën e saj të re.
Por përtej pasarelave dhe kontratave të mëdha, modelja ka folur edhe për mënyrën se si ka ndryshuar këndvështrimi i saj ndaj suksesit.
Në vend që ta masë suksesin vetëm përmes karrierës dhe arritjeve profesionale, Bella ka treguar se sot i kushton më shumë rëndësi kohës për veten, njerëzve të dashur dhe qetësisë.
Dhe nëse ka diçka që duket se mbetet konstante në jetën e saj, është lidhja me Gigi-n. Nga pasarelat te fushatat e modës dhe tashmë në një fermë mes kuajve, motrat Hadid vazhdojnë të dëshmojnë se bashkëpunimi mes tyre funksionon po aq mirë para kamerave sa edhe jashtë tyre.
