Mbi 1 milion banorë janë evakuuar në Kinën lindore, ndërsa tajfuni Dolphin ka goditur rajonin me reshje të dendura, erëra të forta dhe rrezik të lartë për përmbytje.
Stuhia preku tokën të dielën në mbrëmje në provincën Zhejiang, duke shkaktuar ndërprerje të transportit dhe përmbytje në disa zona. Në Shangai, një nga qendrat më të mëdha ekonomike të Kinës, rreth 1,000 fluturime u anuluan të hënën.
Edhe pse autoritetet e kanë ulur klasifikimin e Dolphin nga tajfun në stuhi tropikale, paralajmërimet për reshje ekstreme dhe përmbytje mbeten në fuqi deri të mërkurën.
Dolphin ishte shpallur më herët si stuhia më e fortë që ka goditur Kinën këtë vit. Kur preku tokën në Yuhuan të Zhejiang, erërat arritën shpejtësi deri në 150 km/orë.
Pamjet nga Shangai tregojnë rrugë të përmbytura dhe ujë që ka hyrë në katet e para të bizneseve. Autoritetet u kanë bërë thirrje banorëve të shmangin daljet nga shtëpitë, ndërsa disa prej atraksioneve më të njohura turistike janë mbyllur përkohësisht. Në Zhejiang, autoritetet kanë zhvendosur rreth 900 mijë persona vetëm në Wenzhou, ndërsa rreth 390 mijë të tjerë janë evakuuar në Taizhou.
Janë hapur gjithashtu më shumë se 1,000 qendra emergjence për banorët e evakuuar. Sipas parashikimeve, disa zona të Zhejiang mund të përballen me 250 deri në 500 milimetra reshje gjatë ditëve të ardhshme.
Autoritetet kineze nuk kanë raportuar deri tani viktima në Kinë, por mediat shtetërore bëjnë me dije se një 9-vjeçar nga Wenling rezulton i zhdukur pasi dyshohet se është marrë nga ujërat e detit.
Në provincën Fujian janë pezulluar dhjetëra linja tragetesh, ndërsa janë ndalur më shumë se 100 projekte ndërtimi në det të hapur.
Para se të mbërrinte në Kinë, Dolphin solli reshje të dendura në Filipine, Tajvanin verior dhe Okinawa të Japonisë. Në Filipine, autoritetet raportojnë 8 viktima të lidhura me reshjet e dendura dhe motin e keq, ndërsa më shumë se 7,000 persona janë strehuar në qendra evakuimi. Në Okinawa, pesë persona të moshuar kanë pësuar lëndime, ndërsa në Hong Kong u regjistrua një temperaturë rekord prej 36.9 gradë Celsius.
Tajfunet janë të zakonshme në Paqësorin perëndimor nga maji deri në tetor. Ekspertët paralajmërojnë se kushtet e favorshme atmosferike mund të kontribuojnë në formimin e stuhive më intensive gjatë këtij sezoni.
