Një gjykatë në Nevada ka vendosur që një intervistë e regjistruar e vitit 2008 e Duane “Keffe D” Davis me policinë do të pranohet si provë në gjyqin e ardhshëm për vrasjen e reperit legjendar Tupac Shakur.
Vendimi u mor të martën nga gjyqtarja Carli Kierny, e cila rrëzoi kërkesën e mbrojtjes për përjashtimin e materialit. Procesi gjyqësor ndaj Davis, 63 vjeç, është planifikuar të nisë më 10 gusht në Las Vegas dhe pritet të zgjasë rreth katër javë.
Prokuroria argumentoi se nuk ekziston asnjë bazë ligjore që intervista të mos përdoret si provë në gjykatë. Ndërkohë, avokati mbrojtës, Michael Sanft, këmbënguli se biseda e zhvilluar me hetuesit në vitin 2008 ishte konfidenciale dhe se klientit të tij i ishte thënë se deklaratat nuk do të përdoreshin kundër tij.
Vrasja e Tupac Shakur ka mbetur për dekada një nga çështjet më të famshme të pazgjidhura në historinë e Shteteve të Bashkuara. Hetimet morën një kthesë të re pasi Keffe D filloi të fliste publikisht për ngjarjen, përfshirë edhe në librin që bashkëshkroi, ku pretendoi se ndodhej në Cadillac-in nga i cili u qëllua ndaj reperit dhe se kishte siguruar armën e përdorur në sulm.
Pjesë nga intervista e tij u përdorën më vonë në librin e ish-detektivit të Policisë së Los Anxhelosit, Greg Kading, “Murder Rap: The Untold Story of the Biggie Smalls & Tupac Shakur Murder Investigations”, si edhe në disa dokumentarë, përfshirë “Sean Combs: The Reckoning”.
Tupac Shakur u qëllua më 7 shtator 1996 në Las Vegas, teksa ndodhej në një automjet të ndaluar në semafor së bashku me Marion “Suge” Knight, themeluesin e Death Row Records. Sipas hetimeve, një Cadillac i bardhë u afrua pranë makinës së tyre dhe nga ai u hap zjarr.
Reperi u godit disa herë me armë zjarri dhe ndërroi jetë gjashtë ditë më vonë si pasojë e plagëve të marra, ndërsa Knight mbijetoi me lëndime të lehta. Pas gati tre dekadash, çështja vazhdon të jetë në qendër të vëmendjes, ndërsa gjyqi i ardhshëm pritet të sjellë zhvillime të rëndësishme.
