Policia malazeze arrestoi shtetasin e Maqedonisë Andrej Tanaskovski në Nikshiq, i cili kërkohej për tentativë vrasjeje ndaj Marko Ljubishës, i njohur si Kan, raportojnë mediat malazeze, duke u thirrur në disa burime nga Drejtoria e Policisë së Malit të Zi.
Sipas informacioneve, Tanaskovski u arrestua në një apartament të fshehtë në lagjen Vidrovan të Nikshiqit. Bashkë me të është arrestuar edhe 34-vjeçari Neno Markoviq nga Nikshiqi, i dyshuar se e ka ndihmuar të fshihej nga organet e rendit pas kryerjes së veprës penale.
Policia malazeze njoftoi se 19-vjeçari Tanaskovski dyshohet se më 7 gusht 2025, në kompleksin e hotelit “Maestral” në Budva, ka tentuar ta vrasë 56-vjeçarin Marko Ljubisha – Kan, i cili konsiderohet anëtar i një fraksioni të klanit kriminal ballkanik “Shkalljar”.
“Për A.T. ishte lëshuar një fletarrestim ndërkombëtar për veprën penale të vrasjes në tentativë, pasi me armë zjarri ka qëlluar dy herë në drejtim të viktimës, duke i shkaktuar M.L. lëndime trupore në pjesën e kokës. Të dyshuarit i ngarkohen edhe veprat penale të mbajtjes së paligjshme të armës dhe falsifikimit të dokumentit. Sipas dyshimeve, gjatë planifikimit të sulmit, A.T. ka përdorur një letërnjoftim të falsifikuar me inicialet J.G. nga Republika e Serbisë, me të cilin ishte regjistruar në një objekt hotelerie pranë vendit të sulmit”, thuhet në njoftimin e policisë malazeze.
