Gjermania, vendi i njohur për traditën e prodhimit dhe konsumit të birrës, po përjeton një ndryshim të rëndësishëm në preferencat e konsumatorëve. Sipas të dhënave të publikuara nga Zyra Federale e Statistikave (Destatis), prodhimi i birrës pa alkool u rrit me 6.5% gjatë vitit 2025, duke arritur në mbi 616 milionë litra, ndërsa prodhimi i birrës me alkool shënoi një rënie prej 5.8%.
Megjithëse birra tradicionale vazhdon të dominojë tregun për nga vlera ekonomike, ekspertët flasin për një ndryshim të qartë të zakoneve të konsumit, i nxitur kryesisht nga brezi i ri, shqetësimet për shëndetin dhe rritja e kostos së jetesës. Vlera e prodhimit të birrës me alkool gjatë vitit të kaluar arriti në rreth 6.4 miliardë euro, ndërsa segmenti i birrës pa alkool u vlerësua në afro 696 milionë euro.
Statistikat tregojnë gjithashtu se konsumi i përgjithshëm i birrës në Gjermani ka rënë në nivelin më të ulët të tre dekadave të fundit. Për herë të parë që nga fillimi i matjeve moderne statistikore në vitin 1993, shitjet ranë nën kufirin e tetë miliardë litrave. Gjatë vitit 2025 u shitën rreth 7.8 miliardë litra birrë, një rënie prej 6% krahasuar me një vit më parë.
Sipas Destatis, kjo përkthehet në rreth një miliard shishe më pak të konsumuara, ose mesatarisht 12 shishe më pak për çdo gjerman brenda një viti. Ndryshimi i zakoneve po reflektohet edhe në treguesit e shëndetit publik. Në vitin 2023, numri i personave të shtruar në spital për helmim akut nga alkooli zbriti në 62.300, niveli më i ulët që nga viti 2001. Krahasuar me vitin 2013, kur u regjistruan 116.500 raste, shifrat tregojnë një ulje prej 46.5%.
Sipas Shoqatës Gjermane të Prodhuesve të Birrës, birrat pa alkool janë segmenti me rritjen më të shpejtë në industri. “Birrat pa alkool përfaqësojnë segmentin që po zgjerohet më shpejt”, deklaroi presidenti i shoqatës, Christian Weber. Sot në Gjermani ofrohen më shumë se 800 lloje birrash pa alkool, ndërsa ky segment ka regjistruar më tepër se dyfishim të prodhimit gjatë dy dekadave të fundit, duke e kthyer vendin në tregun më të madh euro.
