Kur flitet për ndikimin e kohës së tepërt para ekranit, vëmendja zakonisht përqendrohet te shëndeti mendor. Megjithatë, ekspertët paralajmërojnë se telefonat inteligjentë, kompjuterët dhe pajisjet e tjera digjitale po lënë gjurmë edhe në trupin e njeriut. Studimet e fundit sugjerojnë se përdorimi i vazhdueshëm i teknologjisë mund të ndikojë në formën e qafës dhe shtyllës kurrizore, të dëmtojë shikimin, të dobësojë forcën muskulore dhe të ndikojë në aftësitë motorike. Disa specialistë madje paralajmërojnë se zakonet e krijuara nga përdorimi i pajisjeve mund të kontribuojnë edhe në shfaqjen e rrudhave.
Një nga pasojat më të njohura të përdorimit të telefonave është ajo që ekspertët e quajnë “tech neck” ose “qafa teknologjike”. Kur një person e mban kokën të përkulur për të parë ekranin, qafa përballet me një presion shumë më të madh se zakonisht. Sipas specialistëve, ky pozicion mund të ushtrojë deri në 27 kilogramë presion shtesë mbi qafën, shkruan BBC. Me kalimin e kohës, kjo mund të dëmtojë disqet e shtyllës kurrizore, të përshpejtojë degjenerimin e nyjeve dhe muskujve, madje edhe të ndikojë në kapacitetin e mushkërive.
Ekspertët rekomandojnë që telefoni të mbahet në nivelin e syve dhe ekrani të jetë rreth një gjatësi krahu larg fytyrës. Gjithashtu këshillohet marrja e pushimeve të rregullta nga ekrani, idealisht çdo 20 deri në 30 minuta. Një shqetësim tjetër që po diskutohet gjithnjë e më shpesh është mundësia që pozicioni i vazhdueshëm i përkulur të kontribuojë në krijimin e rrudhave në qafë.
Dermatologia britanike Justine Hextall thotë se teoria ka kuptim, pasi lëvizjet dhe palosjet e përsëritura të lëkurës mund të favorizojnë krijimin e rrudhave. Megjithatë, ajo thekson se deri më tani mungojnë studimet shkencore që vërtetojnë qartë këtë lidhje. Ajo paralajmëron gjithashtu konsumatorët të jenë të kujdesshëm ndaj produkteve kozmetike që pretendojnë se trajtojnë “qafën teknologjike”, pasi përfitimet e tyre nuk janë të provuara.
