Rita Ora po shijon disa ditë pushimi në Mykonos të Greqisë, ku ka tërhequr vëmendjen me paraqitjen e saj plot stil në një jaht luksoz.
Këngëtarja shqiptare me famë botërore u fotografua e veshur me një bikini metalike me motive lëkure gjarpri, teksa kalonte kohë me miqtë e saj në detin Egje. Artistja dukej në super formë, ndërsa buzëqeshte, realizonte fotografi dhe shijonte atmosferën verore, shkruan DailyMail.
Pas një zhytjeje në det, Rita u freskua nën dushin e jahtit, ndërsa nuk munguan as aktivitetet sportive. Ajo u pa duke bërë paddleboarding dhe më pas provoi edhe jet ski, duke treguar se pushimet e saj janë të mbushura me aventurë.
Artistja gjeti kohë edhe për relaks, duke marrë rreze dielli në pjesën e përparme të jahtit dhe duke kaluar momente me mikun e saj të ngushtë, Vas J Morgan. Flokët biondë platin i mbrojti me një shami jeshile, ndërsa pamjen e kompletoi me aksesorë argjendi dhe një varëse të veçantë.
Para se të dilte në det, Rita realizoi edhe disa fotografi në tokë, ku kombinoi bikinin me pantallona të shkurtra sportive në ngjyrë të kuqe, duke vënë në pah fizikun e tonifikuar. Ajo dhe Vas J Morgan u panë gjithashtu duke vallëzuar dhe shijuar atmosferën festive gjatë lundrimit.
Në rrjetet sociale, këngëtarja ndau disa nga momentet e pushimeve, të cilat i përshkroi me fjalët: “Summer Diaries” (“Ditari i verës”).
Megjithatë, pushimet nuk e kanë larguar nga projektet profesionale. Në një intervistë të fundit, Rita bëri të ditur se fokusi i saj kryesor mbetet publikimi i muzikës së re.
Kam përdorur këtë vit si një periudhë ndërtimi. Muzika e re është në krye të listës sime dhe do të vijë shumë shpejt”
-u shpreh ajo.
Artistja zbuloi gjithashtu se gjatë këtij viti ka përfunduar xhirimet e dy filmave në Australi dhe se do të kishte dëshirë të ishte pjesë e një projekti të drejtuar nga bashkëshorti i saj, regjisori Taika Waititi.
Rita Ora dhe Taika Waititi janë të martuar që nga viti 2022 dhe në muajin gusht do të festojnë katërvjetorin e martesës së tyre.
Së fundmi, këngëtarja ka folur edhe për kujdesin ndaj shëndetit, duke treguar se ka ngrirë vezët në moshën 24 dhe 27-vjeçare, një vendim që e konsideron ndër më të rëndësishmit që ka marrë për të ardhmen e saj.
Mes angazhimeve në muzikë, film dhe jetën personale, Rita Ora duket se po shijon një verë të mbushur me relaks, energji dhe plane të mëdha për rikthimin e saj artistik.
