Reperi i njohur Drake ka reaguar me dhimbje pas lajmit për vdekjen e producentit të njohur Tay Keith, duke i kushtuar një homazh prekës në rrjetet sociale vetëm një ditë pasi u raportua ndarja e tij nga jeta në moshën 29-vjeçare.
Producenti, emri i vërtetë i të cilit ishte Brytavious Lakeith Chambers, u gjet pa shenja jete në apartamentin e tij në Nashville, Tennessee, pas një kontrolli mirëqenieje të kryer nga autoritetet lokale. Sipas raportimeve, policia nuk dyshon për ndonjë akt kriminal, ndërsa shkaku i vdekjes ende nuk është bërë i ditur dhe pritet të konfirmohet pas autopsisë.
Drake, i cili bashkëpunoi me producentin në disa projekte të suksesshme, ndau një mesazh emocional në Instagram.
Mirënjohje e pafund dhe e përjetshme për shpirtin tënd dhe për kontributet e tua në këtë gjë që ne të gjithë e duam kaq shumë. Do të na mungosh shumë
-shkroi artisti kanadez.
Krahas mesazhit, ai publikoi edhe një portret në kujtim të producentit të ndjerë, duke prekur fansat dhe kolegët e industrisë muzikore.
Tay Keith ishte një nga emrat më të njohur të skenës hip-hop amerikane. I lindur në Memphis, ai fitoi famë ndërkombëtare falë bashkëpunimeve me artistë të mëdhenj dhe u nominua për çmimin Grammy si bashkëproducent i këngës së suksesshme “Sicko Mode” të Travis Scott, ku mori pjesë edhe Drake.
Ai ishte gjithashtu producent i hiteve si “Nonstop” dhe “Rich Flex”, duke lënë gjurmë të rëndësishme në muzikën rap të viteve të fundit.
Lajmi për vdekjen e tij ka tronditur botën e muzikës, ndërsa shumë artistë dhe fansa kanë shprehur ngushëllimet e tyre për humbjen e një prej producentëve më të talentuar të brezit të ri.
