Një avion i vogël u rrëzua mbrëmjen e së martës në një autostradë në Laredo dhe shpërtheu në flakë, duke shkaktuar panik mes drejtuesve të automjeteve që ndodheshin në zonë.
Sipas policisë, në bord ndodheshin gjashtë persona, ndërsa njëri prej tyre humbi jetën. Avioni u rrëzua pak pas orës 22:00 në autostradën Loop 20, bëri të ditur hetuesi i policisë lokale, Jose Baeza.
Autoritetet njoftuan se nuk ka raportime për të lënduar mes personave që udhëtonin me automjete në autostradë. Ndërkohë, qarkullimi në Loop 20 është ndërprerë në të dy drejtimet.
Një dëshmitare, Zayra Garza, e cila po transportonte kolegët e saj në shtëpi, tha se nisi të filmonte skenën sapo iu afrua vendit të aksidentit. Ajo ndaloi automjetin përballë avionit të përfshirë nga flakët dhe pa një person brenda kabinës që përpiqej të thyente xhamin për të dalë.
Sipas saj, disa drejtues automjetesh zbritën menjëherë nga makinat dhe tentuan të thyenin xhamin nga jashtë për të ndihmuar të bllokuarit.
“Dukej si një skenë filmi. Isha në shok”, tha Garza.
Ajo tregoi se bashkëshorti i saj gjithashtu u afrua për të ndihmuar dhe pak më vonë dera e avionit u hap. Tre persona që dukeshin si adoleshentë dolën me shpejtësi nga avioni, të ndjekur nga një person që besohej të ishte piloti.
Një anëtar tjetër i ekuipazhit tentoi të nxirrte nga avioni një person që dukej i pavetëdijshëm.
“Gjëja që më shqetësonte më shumë ishte zjarri. Kisha frikë se avioni mund të shpërthente në çdo moment”, u shpreh dëshmitarja.
Autoritetet amerikane kanë nisur hetimet për të përcaktuar shkaqet e rrëzimit të avionit.
