Superylli brazilian Neymar ka ndarë një lajm të gëzueshëm me fansat e tij gjatë periudhës së Kupës së Botës, duke zbuluar se familja e tij do të zgjerohet sërish.
Futbollisti dhe bashkëshortja e tij, Bruna Biancardi, kanë bërë të ditur se janë në pritje të një fëmije tjetër. Çifti pret ardhjen në jetë të vajzës së tretë së bashku, duke shtuar edhe një anëtare të re në familjen e tyre.
Lajmi u publikua përmes një videoje emocionuese në Instagram, ku Neymar dhe Bruna shfaqen të rrethuar nga të afërmit dhe fëmijët e tyre, në një atmosferë plot gëzim dhe festë.
Me humorin që e karakterizon, sulmuesi brazilian bëri shaka me faktin se familja e tij po mbushet me vajza, duke thënë se së shpejti mund të krijojë një grup të vogël që do ta quajë “Spice Girls”.
Neymar është tashmë baba i katër fëmijëve. Përveç vajzave që ka me Brunën, ai është edhe babai i Helenës, vajzës së lindur nga marrëdhënia e tij me Amanda Kimberlly. Ardhja në jetë e Helenës kishte tërhequr vëmendje të madhe mediatike, pasi ndodhi në një periudhë kur futbollisti ishte ende në një raport të ndërlikuar me Brunën.
Ndërkohë, emri i Neymarit vazhdon të jetë në qendër të vëmendjes jo vetëm për jetën personale, por edhe për situatën e tij sportive. Futbollisti është grumbulluar me kombëtaren e Brazilit për Kupën e Botës, por një dëmtim e ka mbajtur larg fushës së lojës.
Për shkak të problemit fizik, ai mungoi në ndeshjen e parë të Brazilit ndaj Marokut, ndërsa tifozët presin me interes të mësojnë nëse do të jetë gati për sfidat e ardhshme të turneut.
Pavarësisht mungesës në fushë, Neymar duket se ka gjetur arsye të mëdha për të festuar jashtë saj, teksa përgatitet të mirëpresë fëmijën e tij të pestë.
